Atyraý munaı óńdeý zaýytynyń qorynda qansha janar-jaǵar maı bar
ATYRAÝ. KAZINFORM – Atyraý munaı óńdeý zaýytynda 1 qazannan beri josparlanǵan aldyn alý jumysy bastalǵan edi. Qazir bul zaýyttyń qoryndaǵy janar-jaǵar maıdyń qory qansha?
«Atyraý munaı óńdeý zaýyty» JShS-niń qoǵammen baılanys bóliminiń aqparatyna qaraǵanda, qazir josparlanǵan aldyn alý jumystary bekitilgen kestege saı júrgizilip jatyr. Sonyń aıasynda birneshe baǵyttaǵy jumys qolǵa alynǵan. Bul – jabdyqtardy tazalaý, peshter men reaktorlardy qaptaý, tozǵan jabdyqtar men katalızatorlardy aýystyrý, kolonna jabdyǵynyń ishki qurylǵylaryn modıfıkatsııalaý. Sondaı-aq, qysymmen jumys isteıtin quraldardy tekserý men qadaǵalaý jóninde is-sharalar qolǵa alynǵan.
«Zaýyttyń buryn jınalǵan qory esebinen josparlanǵan aldyn alý jumystary kezinde Energetıka mınıstrliginiń kestesine sáıkes benzın, dızel otyny, suıytylǵan gaz, avıaotyn jáne basqa da munaı ónimderi turaqty ári júıeli jóneltilip jatyr. Qazir zaýyttaǵy rezervýar parkinde10,9 myń tonna avtobenzın, 4,1 myń tonna dızel otyny, 2,4 myń tonna avıotyn jáne 100 tonna suıytylǵan gaz bar. Kún saıyn orta eseppen 1,1 myń tonna avtobenzın, 1,2 myń tonna dızel otyny jóneltilip otyr. Batys Qazaqstan oblysynyń munaı bazalarynda 2024 jyldyń 16 qazandaǵy málimet boıynsha AI-92 markaly benzınniń 2,7 myń tonnasy saqtalyp tur. Jolda shamamen 1,29 myń tonna ónim bar. AI-92 benzıniniń bazadaǵy jáne joldaǵy jalpy kólemin eskersek, Batys Qazaqstan oblysynda 3,98 myń tonna benzın bar. Bul – shamamen eki aptaǵa jetetin qor», -dep habarlady kásiporynynń qoǵammen baılanys bólimi.
Sondaı-aq ishki naryqta turaqty jaǵdaıdy saqtap turý úshin «QazMunaıGazdyń» basqa munaı óńdeý zaýyttarynda janar-jaǵarmaı materıaldarynyń jekelegen túrlerin óndirý kólemi ulǵaıtylǵan. Máselen, «Pavlodar munaı-hımııa zaýyty» JShS-dan jáne «PQOP» JShS-nen (Shymkent MÓZ) kúnine orta eseppen sáıkesinshe 4,2 myń jáne 7,4 myń tonna avtobenzın, 7 myń jáne 5,5 myń tonna dızel otyny jóneltiledi.
«Atyraý munaı óńdeý zaýytynda josparlanǵan aldyn alý jumystaryn qazan aıynyń sońynda deıin aıaqtaý josparlanyp otyr. Kásiporyn osy kezde turaqty tehnologııalyq rejımge shyǵady», - dep málim etti kásiporynnyń qoǵammen baılanys bóliminen.
Eske sala ketelik, budan buryn Atyraý munaı óńdeý zaýytynda josparlanǵan aldyn alý jumystary bastalǵanyn habarlaǵan edik.