Atyraý munaı óńdeý zaýytynyń qondyrǵysynda aýaǵa gaz jaǵyldy

ATYRAÝ. KAZINFORM — Atyraý munaı óńdeý zaýytynyń benzındi gıdrotazartý qondyrǵysynyń bý kolonnasynda serippeli saqtandyrǵysh klapany iske qosylǵan. Sonyń saldarynan artyq gaz shtattan tys jaǵdaılardyń aldyn alý úshin aýaǵa gaz jaǵylǵan.

Atyraý munaı óńdeý zaýytynyń baspasóz qyzmeti bul derekti rastap, aqparat taratty. 

«Búgin, 29 qarashada saǵat 09:57-de Naphtha HT (3204 tıtýly) benzınin gıdrotazartý qondyrǵysynda bý kolonnasynyń serippeli saqtandyrǵysh klapany iske qosyldy. Sol sebepten, artyq gaz shtattan tys jaǵdaılardyń aldyn alý úshin alaý júıesine jiberildi. Qazir qatań reglamentke sáıkes tehnologııalyq protsess turaqtandyryldy. Bul jaǵdaı qondyrǵynyń jumys rejımine áser etpegenin rastaımyz. Tehnologııalyq protsess shtattyq rejımde jalǵasyp jatyr», — dep habarlady zaýyttyń baspasóz qyzmeti.

Qazir zaýyt mamandary klapannyń iske qosylý sebepterine taldaý júrgizýdi bastaǵan.

«Barlyq is-sharalar qoldanystaǵy normatıvtik qujattar men ónerkásiptik qaýipsizdik standarttarynyń talaptaryna tolyq sáıkes oryndalady. Atalǵan oqıǵanyń sebepteri men qabyldanǵan sharalar týraly qosymsha aqparat barlyq qajetti is-sharalar aıaqtalǵannan keıin beriledi. Zaýyt ashyqtyqqa, zańnamany saqtaý jáne jabdyqty qaýipsiz jáne senimdi paıdalanýdy qamtamasyz etý qaǵıdattaryna óziniń adaldyǵyn rastaıdy», — dep málim etti baspasóz qyzmetinen.

Eske sala ketelik, budan buryn Aýasy lastanǵan Atyraýda qorshaǵan ortany qaı kompanııalar búldiretinin habarlaǵan edik.