Atyraý munaı óńdeý zaýytynyń eski bóligindegi jabdyqtar jańartylady
ATYRAÝ. KAZINFORM — «QazMunaıGaz» UK AQ Basqarma tóraǵasy Maǵzum Myrzaǵalıev Atyraý munaı óńdeý zaýytynyń tehnologııalyq, mehanıkalyq tazartý qondyrǵylaryn, estakadalar men temirjol jumysyn tekserdi.
Zaýyt dırektorynyń mindetin atqarýshy Oleg Lyzlov jýyrda janarmaı tógilip, alaıda óndiriske áser etpegen býtenderdi olıgomerızatsııalaý men avtomattandyrylǵan ashyq tústi munaı ónimderin quıý qondyrǵysynyń jumysy týraly málimet berdi.
«Qazir zaýyt shtattyq rejımde jumys istep tur. Ónim shyǵarý men jóneltýde irkilis joq. Úsh kezeńdi jańǵyrtýdan ótken zaýytta byltyr shamamen 5,5 mln tonna munaı óńdeldi. Bul — rekordtyq kórsetkish. Munda 4,9 mln tonnaǵa jýyq taýarlyq ónim shyǵaryldy. Ortasha óńdeý tereńdigi — 82,1 paıyzǵa ósti», - dedi Maǵzum Myrzaǵalıev.
«QazMunaıGaz basshysy jaqynda Atyraý munaı óńdeý zaýytynyń qondyrǵylarynda bolǵan jaǵdaıǵa qatysty túsinik berdi.
«Áli de jetildire túsetin tustarymyz bar. Atap aıtsaq, zaýyttyń modernızatsııadan ótpegen, eski bóligindegi jabdyqtary 40-shy jyldardan beri jumys istep kele jatyr. Qazir kásiporynda operatsııalyq tıimdilikti arttyrý jobasy qolǵa alyndy. Joba aıasynda kásiporynnyń eski bóliginiń negizgi jabdyqtaryn jańartý josparlandy. Zaýytta birqatar ekologııalyq jobalar iske asyrylyp jatyr. Elektr qýatyn kúsheıtý jáne atmosferaǵa zııandy shyǵaryndylar qaýpin azaıtý úshin gaz týrbınaly elektr stantsııasyn salý josparlanyp otyr», - dedi Maǵzum Myrzaǵalıev.
Eske sala ketelik, budan buryn Atyraý munaı óńdeý zaýytynda qondyrǵy kollektorynan aqaý shyqqanyn jazǵan bolatynbyz.
Keıin aqaýdyń sebebin arnaıy komıssııa tekseretinin habarlaǵan edik.
