Atyraý munaı óńdeý zaýytynyń eks-dırektorynan 2 mlrd teńge zalal óndirildi

ATYRAÝ. KAZINFORM — Atyraý soty munaı óńdeý zaýytynyń eks-dırektoryn QR Qylmystyq kodeksiniń 371-babynyń 2-bóligimen kináli dep tanydy. Alaıda, atalǵan qujattyń 71-babynyń 1-bóligi negizinde eskirý merziminiń ótýine baılanysty qylmystyq jaýaptylyqtan bosatty.

Atyraý qalasyndaǵy № 2 sotynda «AMÓZ» JShS-niń burynǵy bas dırektoryna qatysty qylmystyq is qaraldy. Eks-dırektorǵa QR Qylmystyq kodekstiń 371-babynyń 2-bóligimen aıyp taǵylǵan. 

Sot isiniń materıalyna qaraǵanda, eks-dırektor birneshe kemshilikke jol bergen. Birinshiden, memlekettik fýnktsııalardy oryndaýǵa ýákilettik berilgen adamdarǵa teńestirilgen tulǵa bola tura, júıelerdiń tıimdi jumys isteýin, ekinshiden, óndiristik máseleler boıynsha sheshimder qabyldaý jónindegi zań jáne kásiporyn jarǵysy talaptarynyń oryndalýyn qamtamasyz etpegen. Úshinshiden, merdiger-JShS kepildik mindettemeleri sheńberinde jylý almastyrǵyshty jóndeýge sharalar qabyldaý múmkindigine ıe bola tura, jóndeý jumystaryn júrgizý úshin satyp alý týraly tender jarııalaǵan. Sonyń nátıjesinde jylý almastyrǵyshty jóndeýge shamamen 2 mlrd teńge negizsiz bólingen.

«QR Qylmystyq kodeksiniń 11-babynyń 2-bóligine sáıkes, 371-babynyń 2-bóliginde kózdelgen áreket onsha aýyr emes qylmys bolyp tabylady. Al, 71-babynyń 1-bóligine sáıkes, eger onsha aýyr emes qylmys jasalǵan kúnnen bastap eki jyl ótse, tulǵa qylmystyq jaýaptylyqtan bosatylady. Qylmystyq jaýapkershilikke tartýdyń merzimi ótip ketken. Sottalýshy Qylmystyq kodekstiń 371-babynyń 2-bóligimen kináli dep tanyldy. Ol 71-baptyń 1-bóligi negizinde eskirý merziminiń ótýine baılanysty qylmystyq jaýaptylyqtan bosatyldy», — dep habarlady sottyń baspasóz qyzmeti.

Sondaı-aq, eks-dırektordan memleket paıdasyna shamamen 2 mlrd teńge zalal óndirildi.

Sot úkimi zańdy kúshine engen joq.

Eske sala keteıik, budan buryn Atyraý munaı óńdeý zaýytynyń burynǵy bas dırektory 2 aı úı qamaqta otyratynyn jazǵan bolatynbyz.