Atyraý munaı óńdeý zaýytynyń eks-dırektoryna 6,9 mln teńge aıyppul salyndy

ATYRAÝ. KAZINFORM – Atyraý oblystyq sotynyń apellıatsııalyq alqasynda «AMÓZ» JShS-niń burynǵy bas dırektoryna qatysty úkim qaıta qaraldy.

Atyraý qalasyndaǵy №2 sotynyń úkimimen Atyraý munaı óńdeý zaýytynyń burynǵy bas dırektory QR Qylmystyq kodeksiniń 371-babynyń 2-bóligimen (Salǵyrttyq, ıaǵnı memlekettik fýnktsııalardy oryndaýǵa ýákilettik berilgen adamǵa teńestirilgen adamnyń óz mindetterin qyzmetine adal qaramaýy saldarynan tıisinshe oryndamaýy, abaısyzda aýyr zardaptarǵa ákep soqtyrýy) boıynsha kináli dep tanylǵan edi. Alaıda atalǵan qujattyń 71-babynyń 1-bóligine sáıkes eskirý merziminiń ótýine baılanysty qylmystyq jaýaptylyqtan bosatyldy.

– Іs apellıatsııalyq alqaǵa advokattardyń, qorǵaýshylardyń, azamattyq jaýapker ókiliniń shaǵymdary jáne prokýrordyń ótinishhaty boıynsha tústi. QR Qylmystyq kodeksiniń 11-babynyń 2-bóligine sáıkes, 371-babynyń 2-bóliginde kózdelgen áreket onsha aýyr emes qylmys bolyp sanalady, - dep habarlady oblystyq sottyń baspasóz qyzmeti.

Sot alqasy taraptardy tyńdap, is materıaldaryn zerttedi. Atalǵan is boıynsha eskirý merzimi ótpegen degen qorytyndyǵa keldi.

– Birinshi saty sotynyń úkimi ózgertilip, sottalýshyǵa QR Qylmystyq kodesiniń 371-babynyń 2-bóligi boıynsha 6,9 mln teńge (2023 jylǵa 2 000 AEK) kóleminde aıyppul salý jazasy taǵaıyndaldy. Sot úkiminiń basqa bóligi ózgerissiz qaldyryldy, - dep málim etti sottyń baspasóz qyzmetinen.

Eske sala ketelik, buǵan deıin Atyraý munaı óńdeý zaýytynyń eks-dırektorynan 2 mlrd teńge zalal óndiriletinin habarlaǵan bolatynbyz.