Atyraý munaı óńdeý zaýytynyń bıýdjetke tóleıtin salyǵy byltyrǵydan 1,5 esege artty

Atyraý oblysyndaǵy iri salyq tóleýshilerdiń qatarynda munaı óńdeý zaýyty da bar. Bıyl otandyq kásiporynnyń bıýdjetke tóleıtin salyǵy byltyrǵydan 1,5 esege artyp otyr, dep habarlaıdy Kazinform.

Kásiporynnyń qoǵammen baılanys bólimi usynǵan aqparatqa qaraǵanda, bıyl qańtar-qarasha aılary aralyǵynda zaýyt 142 mlrd teńgeden astam salyq tólegen. Onyń ishinde 22,2 mlrd teńge respýblıkalyq bıýdjetke, al, 120 mlrd teńgeden astamy jergilikti qazynaǵa túsken.

«Byltyr Atyraý munaı óńdeý zaýytynan túsken salyq tólemderi Atyraý qalalyq ákimdigi bıýdjetindegi jalpy shyǵystyń 33 paıyzyn qurady. Endi bıyl jyl sońyna deıin kásiporyn bıýdjetke tóleıtin salyqtyń kólemin 154,7 mlrd teńgege jetkizýdi josparlap otyr. ıAǵnı, byltyrǵy kórsetkishten 1,5 ese artty», - dep habarlady zaýyttyń qoǵammen baılanys bólimi.

Zaýyt basshylarynyń aıtýynsha, salyq tólemderiniń ulǵaıýyna áser etken birneshe sebep bar. Birinshiden, bul zaýytta júrgizilgen úsh kezeńdi jańǵyrtýdyń ekonomıkalyq tıimdiligimen baılanysty bolyp otyr.

Ekinshiden, jańǵyrtý jumystarynyń nátıjesinde dızel otyny, benzın, kerosın jáne paraksılol sekildi qosylǵan quny joǵary ashyq tústi munaı ónimderin shyǵarý kólemi artqan.

Úshinshiden, salyq tólemderiniń ósýine benzın men dızel otynyna aktsız stavkalarynyń kóterilgeni yqpaly tıgen.

Eske sala ketelik, buǵan deıin Atyraý munaı óńdeý zaýyty tolyq qýatynda jumys isteýge kóshkenin habarlaǵan edik.