Atyraý munaı óńdeý zaýytynyń baıaý koksteý qondyrǵysynda aqaýlar anyqtalǵan
ATYRAÝ. KAZINFORM – Atyraý munaı óńdeý zaýytyndaǵy josparlanǵan aldyn alý jumystary kezinde baıaý koksteý qondyrǵysynda qosymsha aqaýlar anyqtalǵan. Qazir aqaýdy joıý júrip jatyr.
Kásiporynnyń baspasóz qyzmetinen málim etkendeı, zaýyttyń qondyrǵylaryn iske-qosý baptaý tolyq aıaqtalǵan. Qazir ELTQ AQ-2, ELTQ-AVQ-3, benzın men dızel otynyn gıdrotazartý, kúkirt óndirý, aralas kúkirt óndirý, katalıtıkalyq rıformıng (CCR), katalıtıkalyq krekıng, cuıytylǵan kómirsýtekti gazdardy kúkirtsizdendirý (Sulfrex), naftany selektıvti gıdrogenızatsııalaý (Prime G), jeńil gazoıldi gıdrotazartý (Prime D), TAME óndirisi jáne naftany gıdrotazartý sekildi negizgi óndiristik qondyrǵylar shtattyq rejımde jumys istep tur.
«Josparlanǵan aldyn alý jumystary kezinde baıaý koksteý qondyrǵysynda qosymsha aqaýlar anyqtaldy. Qazirgi kezde aqaýlardy joıý júrgizilip jatyr. Qondyrǵyny jaqyn arada iske qosý josparlanyp otyr», dep habarlady zaýyttyń baspaósz qyzmeti.
Soǵan qaramastan zaýyttyń táýliktik munaı óńdeý kórsetkishi 14 myń 380 tonnany qurap otyr. Qarasha aıynyń basynan beri 43 myń 800 tonna shıkizat óńdeldi. Qazir táýligine 4 myń 930 tonna avtobenzın, 2 300 tonna dızel otyny, 1 100 tonna suıytylǵan gaz, 900 tonna áýe otyny taýarly ónim shyǵarylǵan.
«Munaı ónimderin Energetıka mınıstrligi bekitken josparǵa sáıkes jóneltý qolǵa alyndy. Qarashanyń basynan beri 8 myń 300 tonna, onyń ishinde 2 myń 852 tonna AI-95 markaly janarmaı, 5 myń 622 tonna qysqy DT-Z dızel otyny, 2 myń 873 tonna suıytylǵan gaz jóneltildi. Munaı ónimderin jóneltý protsesi kedergisiz jalǵasady», -dep málim etti baspasóz qyzmetinen.
Eske sala ketelik, budan buryn Atyraý munaı óńdeý zaýytynda josparlanǵan aldyn alý jumystary aıaqtalǵanyn habarlaǵan bolatynbyz.
