Atyraý munaı óńdeý zaýytynyń bas dırektory men bas ınjeneri qyzmetinen bosatyldy
ATYRAÝ. KAZINFORM — Atyraý munaı óńdeý zaýytynyń bas dırektory men bas ınjeneri qyzmetinen bosatyldy. «QazMunaıGaz» komıssııasynyń jumysynan keıin osyndaı sheshim qabyldandy.
«QazMunaıGaz» UK AQ Atyraý munaı óńdeý zaýytyndaǵy ahýalǵa baılanysty qurylǵan komıssııa jumysynyń nátıjesin jarııa etti.
«Atyraý munaı óńdeý zaýytynyń bas dırektory Ǵalymjan Jýsanbaev pen bas dırektordyń orynbasary – bas ınjener Ádilet Shoshanbasovty qyzmetterinen bosatý týraly sheshim qabyldandy. Bas dırektordyń mindetin atqarý ári qaraı sheshim qabyldanǵanǵa deıin Atyraý munaı óńdeý zaýyty bas dırektorynyń orynbasary – tehnıkalyq dırektor Oleg Aleksandrovıch Lyzlovqa júkteletin bolady», -dep habarlady kompanııanyń baspasóz qyzmeti.
Zaýyt munaı ónimderin óndirýdi jáne jóneltýdi shtattyq rejımde jalǵastyryp jatyr.
Eske sala ketelik, buǵan deıin «QazMunaıGaz» komıssııasy Atyraý munaıyn óńdeý zaýytyn tekserýdi bastaǵanyn jazǵan bolatynbyz.
