Atyraý munaı óńdeý zaýytynyń bas dırektory aýysty
ASTANA. KAZINFORM – «Atyraý munaı óńdeý zaýyty» JShS-niń bas dırektory (Basqarma tóraǵasy) qyzmetine Muratjan Musaıbekov taǵaıyndaldy, dep habarlaıdy «QazMunaıGaz» ulttyq kompanııasy.
Tıisti sheshim «Atyraý munaı óńdeý zaýyty» JShS qatysýshylarynyń kezekten tys jalpy jınalysynda qabyldandy. Jańa basshyny kásiporyn ujymyna «QazMunaıGaz» UK AQ basqarma tóraǵasynyń orynbasary Áset Maǵaýov tanystyrdy.
Muratjan Musaıbekov eńbek jolynda «QazMunaıGaz» júıesinde birqatar basshylyq qyzmetterdi atqarǵan. Atap aıtqanda, munaı-gaz óńdeý jáne munaı-hımııasy jobalaryn iske asyrý jónindegi dırektor, munaı óńdeý jónindegi basqarýshy dırektor, «QazMunaıGaz – óńdeý jáne marketıng» AQ bas dırektorynyń orynbasary, «KPI Inc.» JShS basqarma tóraǵasynyń birinshi orynbasary bolǵan. Sondaı-aq memlekettik jáne jekemenshik uıymdarda qyzmet atqarǵan.
«QMG basshylyǵy Atyraý munaı óńdeý zaýytynyń aldyna operatsııalyq tıimdilikti arttyrý, jeńil munaı ónimderin óndirý kólemin ulǵaıtý, óndiristik protsesterdiń senimdiligi men energııa tıimdiligin kúsheıtý, ekologııalyq jobalardy jalǵastyrý jáne qyzmetkerler úshin qaýipsiz eńbek jaǵdaıyn qamtamasyz etý mindetterin qoıdy», – delingen habarlamada.
Sondaı-aq qatysýshylardyń kezekten tys jalpy jınalysynyń sheshimimen kásiporynnyń burynǵy bas dırektory (Basqarma tóraǵasy) Qýanysh Bıshimovtiń ókilettigi toqtatyldy.
Aıta keteıik, Ulttyq ekonomıka mınıstrligi apparatynyń basshysy taǵaıyndalǵany habarlandy.
