Atyraý munaı óńdeý zaýytynyń ashyq alańynda kúkirt jınaǵan kompanııaǵa aıyppul salyndy

ATYRAÝ. KAZINFORM – Atyraý jurtshylyǵyn munaı óńdeý zaýytynyń bazasyndaǵy  ashyq alańda kúkirttiń jınalǵany alańdatqan edi. Osyǵan baılanysty jergilikti ekologtar zaýytqa jospardan tys tekserý júrgizip, kúkirt saqtaǵan kompanııaǵa aıyppul salyndy. 

Atyraý oblystyq ekologııa departamentiniń baspasóz qyzmetinen málim etkendeı, 14 qarashada ashyq alańdaǵy kúkirtke baılanysty ujymdyq hat túsken.

«Sonyń negizinde «AMÓZ» JShS-ǵa jospardan tys tekserý júrgizildi. Zaýyt múlikti jalǵa alý sharty boıynsha «Trade Oil Resource» JShS-ǵa bazanyń bir bóligin jalǵa bergen. Al, «Trade Oil Resource» JShS kúkirtti saqtaýshy jáne tasymaldaýshy bolyp otyr. Osyǵan oraı, «Trade Oil Resource» JShS-ǵa da jospardan tys tekserý júrgizildi. Bazanyń jalǵa alynǵan aýmaǵynda qaldyqta arnaıy belgilengen jáne jabdyqtalǵan jerden tys bóliginde jınalǵan. Keı tusynda shashylyp jatyr. Temirjol boıynda jer ústine kúkirttiń shashylǵany anyqtaldy», - dep habarlady departamenttiń baspasóz qyzmeti.

Tekserý qorytyndysymen «Trade Oil Resource» JShS-ǵa shaǵyn kásipkerlik sýbekti ekendigi eskerilip, qysqartylǵan is júrgizý tártibimen jalpy somasy 738 myń 400 teńgeni quraıtyn aıyppul salynǵan. Aıyppul qarjysy tolyq óndirilgen. 

«Departament tarapynan «Trade Oil Resource» JShS-ǵa QR Kásipkerlik kodeksiniń talabyna sáıkes, buzýshylyqty joıý týraly birneshe nusqama berildi. Onyń ishinde baza aýmaǵyndaǵy kúkirt salatyn polıetılendi qaptardy, tselofandardy jınaý tapsyryldy. Al, jer ústinde shashylǵan túıirshiktelgen kúkirtti tazalaý usynyldy. «Trade Oil Resource» JShS baza aýmaǵynan 2025 jyldyń 28 aqpanyna deıin kúkirtti túgel shyǵaryp, bazany «AMÓZ» JShS-ǵa keri tapsyrý, zaýyt basshylyǵy bazany qabyldaǵan soń, ony óz qajetine paıdalaný mindetteldi», - dep málim etti departamenttiń baspasóz qyzmetinen.

Eske sala ketelik, buǵan deıin Atyraý munaı óńdeý zaýytyndaǵy ashyq alańda kúkirt jınaýly turǵanyn jazǵan edik. 

Keıin Atyraý munaı óńdeý zaýytynan ashyq alańda saqtalǵan kúkirt óndiristik qaldyq emesin málim etti.