Atyraý munaı óńdeý zaýytynyń 80 jyldyǵyna oraı munaı-gaz salasynyń 40-tan asa qyzmetkeri marapattaldy
ATYRAÝ. KAZINFORM - Atyraý munaı óńdeý zaýytynyń 80 jyldyǵyna oraı kásiporyn tarıhy men onyń odan ári tehnologııalyq damýy josparlaryna arnalǵan birqatar saltanatty shara ótti.
Zaýytqa QR Parlament Májilisiniń depýtattary, «QazMunaıGaz» UK AQ Basqarma tóraǵasy Ashat Hasenov, QR Energetıka vıtse-mınıstri Qudaıbergen Arymbek, «Samuryq-Qazyna» UÁQ» AQ Basqarýshy dırektory Baqytjan Taýbaev jáne sala ardagerleri bardy.
ELOÝ-AT-2 qondyrǵysynyń óndiris alańynda «Atyraý munaı óńdeý zaýytyndaǵy alǵashqy qondyrǵynyń paıdalanýǵa berilgenine 80 jyl» eskertkish taqtasynyń saltanatty ashylý rásimi ótti. Osy qondyrǵyda uzaq jyl eńbek etken zaýyt ardageri Abdýlla Bıkbaev taqtanyń ashylýy munaı óńdeýshilerdiń barlyq býynyna kórsetilgen qurmet dedi.
Onyń aıtýynsha, bul sımvol benzınniń birinshi tamshysynan bastap eldiń barlyq munaı óńdeý ónerkásibiniń qazirgi jetistikterine deıingi eren eńbekti eske salady.
Sondaı-aq qonaqtarǵa Atyraý munaı óńdeý zaýytynyń jańartylǵan «Tarıh jáne Eńbek Dańqy» mýzeıine ekskýrsııa uıymdastyryldy. Onyń qory sırek kezdesetin muraǵat qujattarmen tolyqtyrylǵan. Budan bólek qonaqtar jańa alleıaǵa baryp, aǵash otyrǵyzdy.
Abaı ortalyǵynda zaýyttyń mereıtoıy men munaı-gaz kesheni qyzmetkerleri kúni aıasynda saltanatty marapattaý rásimi ótti.
Salanyń 40-tan astam eńbek sińirgen qyzmetkeri QR Energetıka mınıstrliginiń, «Samuryq-Qazyna» AQ jáne «QazMunaıGaz» UK AQ-nyń salalyq jáne vedomstvolyq nagradalaryna ıe boldy.
Sonymen qatar, zaýyttyń Bas dırektory Qýanysh Bıshimov mártebeli meımandarǵa merekelik medal men «Dańq joly. Sýretter sóıleıdi» kitabyn tabystady.
Atyraý munaı óńdeý zaýytynyń 80 jyldyǵyna oraı ardagerlermen kezdesýler ótip, «Dańq joly. Taspadaǵy tarıh» atty derekti fılm jáne «Dańq joly. Sýretter sóıleıdi» kitaby tanystyryldy.
