Atyraý munaı óńdeý zaýytyndaǵy josparly jóndeý merziminen buryn aıaqtaldy
ATYRAÝ. KAZINFORM – Atyraý munaı óńdeý zaýyty josparly aldyn alý jumystaryn belgilengen merzimnen 1,5 táýlik buryn aıaqtap, óndiristi kezeń-kezeńimen qaıta iske qosty. Jóndeý barysynda negizgi tehnologııalyq qondyrǵylar jańǵyrtylǵan.
Zaýyttyń bas dırektory Qýanysh Bıshimovtiń aıtýynsha, josparly aldyn alý jumystary ónerkásiptik qaýipsizdik talaptaryna sáıkes júrgizilgen.
– Jóndeý barysynda 20 reaktor, 213 syıymdylyq, 32 kolonna jáne 231 jylý almastyrǵysh jabdyqqa tehnıkalyq kýálandyrý, tekserý jáne saraptama júrgizildi. Sonymen qatar qubyr jelileriniń jekelegen ýchaskeleri jańartylyp, birqatar tehnologııalyq qondyrǵyda 335 tonnadan astam katalızator aýystyryldy. Avtobenzın, dızel otyny jáne avıaotyn sekildi jeńil munaı ónimderin óndirý kólemin arttyrý maqsatynda ELTQ AVT-3 qondyrǵysyndaǵy vakýýmdyq kolonnanyń ishki qurylǵylary jańartyldy, – dep málimdedi zaýyttyń baspasóz qyzmeti.
Josparly jóndeý jumystaryna shamamen 1700 maman men 50-den astam arnaıy tehnıka jumyldyrylǵan.
Kásiporyn málimetinshe, 8 shildede josparly jóndeýden keıin zaýyt alǵashqy munaıdy qabyldap, tehnologııalyq qondyrǵylardy kezeń-kezeńimen iske qosýǵa kirisken.
Budan bólek, zaýytta qosymsha rezervtik qýat kózin qalyptastyrýǵa múmkindik beretin syrtqy energetıkalyq ınfraqurylymdy rekonstrýktsııalaý jobasy júzege asyrylyp jatyr. Sonymen birge kásiporyn jabdyqtarynyń senimdiligin arttyrý maqsatynda úsh jyldyq jóndeýaralyq tsıklge kóshý jónindegi strategııalyq joba kezeń-kezeńimen iske asyrylýda.
Buǵan deıin Atyraý munaı óńdeý zaýyty mańyndaǵy 80 úı kóshirilýi múmkin ekenin jazǵan edik.
