Atyraý munaı óńdeý zaýytyndaǵy jaǵdaı boıynsha jumys toby quryldy

ASTANA. KAZINFORM — «QazMunaıGaz» AQ basqarma tóraǵasynyń orynbasary Dmıtrıı Makeev Atyraý munaı óńdeý zaýytyndaǵy qazirgi ahýal týraly málimet berdi.

«Búgingi tańda Atyraý munaı óńdeý zaýyty shtattyq rejımde jumys istep tur. Eskertýler joq. Sonymen birge, QazMunaıGaz basqarma tóraǵasynyń tapsyrmasymen keshegi áleýmettik jelide taraǵan málimetterdiń qorytyndysy boıynsha tekserý júrgizý úshin jumys toby quryldy. Jumys tobyna músheler tańdap alyndy, jumys júrip jatyr» delingen kompanııanyń baspasóz qyzmeti taratqan beınede. 

Eske salsaq, áleýmettik jelide Atyraý munaı óńdeý zaýytynda apat bolǵany jaıly habar taraǵan edi.