Atyraý munaı óńdeý zaýytyndaǵy órtke qatysty qylmystyq is qozǵaldy
ATYRAÝ. KAZINFORM – Atyraý munaı óńdeý zaýytynyń aýmaǵynda bolǵan órtke qatysty tergeý bastaldy. Qazir mamandar oqıǵanyń shyǵý sebepterin anyqtap jatyr.
Atyraý oblysynyń tótenshe jaǵdaılar departamenti Qazaqstan Respýblıkasy Qylmystyq kodeksiniń 292-baby, ıaǵnı órt qaýipsizdigi talaptaryn buzý boıynsha sotqa deıingi tergep-tekserý amaldary júrgizilip jatqanyn rastady.
Eske salaıyq, 25 tamyzda saǵat 12:35 shamasynda zaýyttyń jabyq tıptegi mehanıkalyq tazartý qurylystarynyń tundyrǵyshynda munaı shlamy tutanǵan. Sol kezde nysanda eshqandaı jumys júrgizilmegen.
Órtti sóndirýge Tótenshe jaǵdaılar mınıstrligi, «Semser órt sóndirýshi», ATMA áýejaıy jáne NCOC kompanııasynyń órt sóndirý-qutqarý qyzmetinen shamamen 65 adam men 19 tehnıka jumyldyryldy.
Órt saǵat 13:42-de oqshaýlanyp, keıin tolyq sóndirildi. Oqıǵa saldarynan zardap shekkender joq.
