Atyraý munaı óńdeý zaýytynda ıis shyǵaratyn munaıtutqysh nysany joıyldy

ATYRAÝ. KAZINFORM – «Atyraý munaı óńdeý zaýyty» JShS-da tabıǵatty qorǵaý sharalary aıasynda qorshaǵan ortaǵa áser etetin ashyq kózdiń biri – REKS munaıtutqyshyn joıý jumystary aıaqtaldy. 

Zaýyttyń baspasóz qyzmetinen málim etkendeı, 1945 jyly paıdalanýǵa berilgen nysannyń aýmany – 1 000 sharshy metr. Al jobalyq kólemi 6 233 sharshy metrdi quraǵan.

– Byltyr qazan aıynda munaıtutqyshty bosatý jumystary bastaldy. Sodan beri 7 100 tonna qaldyq shyǵaryldy. Bıyl sáýir aıynda nysan tolyqtaı joıyldy. Bul joba – Atyraý munaı óńdeý zaýytynyń turaqty damý qaǵıdattary aıasynda qorshaǵan ortaǵa ekologııalyq áserdi azaıtý, óndiristik ınfraqurylymdy jańǵyrtýǵa baǵyttalǵan keshendi sharalardyń biri retinde qolǵa alyndy, - dep habarlady zaýyttyń baspasóz qyzmeti. 

Endi munaıtutqyshtyń ornyna býferlik syıymdylyq pen shaǵyn kondensattyq stantsııa salý josparlanǵan. Jańa nysandar shtattan tys jaǵdaılar kezinde aǵyndy sýlardy qabyldap, ýaqytsha saqtaý úshin paıdalanylady. 

– Zaýyttyń aýmaǵynda 2023 jyly Tazalyq ekologııalyq jobasy aıasynda júrgizilgen mehanıkalyq tazartý qondyrǵylaryn jańǵyrtý jumystary kezinde 5 ashyq toǵan joıylǵan edi. Altynshy basseın – apattyq qambanyń beti aspaly qurylymmen jabyldy, - dep málim etti zaýyttyń baspasóz qyzmetinen. 

Eske sala ketelik, buǵan deıin Atyraý turǵyndaryn alańdatqan ekologııanyń jaqsarmaı turǵanyn jazǵan edik.