Atyraý munaı óńdeý zaýytynda monopolııaǵa qarsy zańnama buzylǵan ba

ATYRAÝ. KAZINFORM — Atyraý munaı óńdeý zaýytynda munaı óńdeýdiń taýar naryǵyndaǵy baǵa men óndiris kóleminiń dınamıkasyna taldaý júrgizilgen. Endi sol taldaýdyń negizinde monopolııaǵa qarsy tekserý bastaldy.

Básekelestikti qorǵaý jáne damytý agenttigi Atyraý oblystyq departamentiniń málimetinshe, birneshe kemshilikti anyqtaǵan. Bul — munaı óńdeý boıynsha monopolııalyq joǵary baǵany belgileý jáne ustap turý.

— Munaıdyń ortasha baǵasynyń 2021 jyldan 2023 jylǵa deıingi kezeńde 31 paıyzǵa ósýine baılanysty monopolııalyq ústem jaǵdaıdy teris paıdalaný belgileri anyqtaldy. Osyǵan oraı monopolııalyq joǵary baǵany belgileý deregi elimizdegi básekelestikti qorǵaý salasyndaǵy zańnamany yqtımal buzýshylyqtarǵa tergep-tekserý júrgizý barysynda aıqyndalatynyn atap ótken jón. Monopolııaǵa qarsy zańnamany buzý deregi rastalsa, aınalymnyń 5 paıyzy mólsherinde aıyppul salynady. Monopolııalyq kiris tárkilenedi. Baǵany negizdelgen deńgeıge deıin tómendetý týraly nusqama engiziledi, - delingen departamenttiń aqparatynda.

Eske sala ketelik, budan buryn Atyraý munaı óńdeý zaýytyndaǵy peshti iske qosý kezinde aqaý shyqqanyn habarlaǵan edik.