Atyraý munaı óńdeý zaýytynda qazanda josparlanǵan aldyn alý jumysy júrgiziledi

ATYRAÝ. KAZINFORM – Atyraý munaı óńdeý zaýytynda 1 qazanda josparly aldyn alý jumystaryn júrgizý bastalady.

Kásiporynnyń qoǵammen baılanys bóliminiń aqparatyna qaraǵanda, bul QR Azamattyq qorǵaý týraly zańynyń talaptaryna, sondaı-aq Energetıka mınıstrligi bekitken jospar-kestesine sáıkes qolǵa alynǵaly otyr.

«Josparly aldyn alý jumystary – aldaǵy ýaqytta tehnologııalyq qondyrǵylardyń qaýipsiz qyzmetin qamtamasyz etý, jabdyqtyń turaqty jumys isteýin qadaǵalaý jáne óndiris tıimdiligin arttyrý úshin munaı óńdeý zaýytynda ótkiziletin qalypty protsedýra. Osy kezeńde Atyraý munaı óńdeý zaýytynda tehnologııalyq jabdyqtar men qubyrlardyń ónerkásiptik qaýipsizdigin tehnıkalyq kýálandyrý, tekserý jáne saraptaý jónindegi is-sharalar keshenin júrgizý josparlandy. Zaýyt toqtaǵan kezde reaktorlyq jabdyqtyń katalızatorlaryn aýystyrý júrgiziledi» -dep habarlady zaýyttyń qoǵammen baılanys bólimi. 

Zaýyttaǵy josparly aldyn alý jumystaryna 2000-nan astam qyzmetker, 70-ke jýyq arnaıy tehnıka jumyldyrylady. 

«Іshki naryqtaǵy janar-jaǵarmaı materıaldarynyń turaqty jaǵdaıyn saqtap turý maqsatynda Atyraý munaı óńdeý zaýytynda munaı ónimderiniń búkil jelisi boıynsha jetkilikti qor kólemi jınaqtalyp jatyr. Munaı ónimderi Energetıka mınıstrliginiń jetkizý kestesine saı ishki naryqqa birkelki jóneltiletin bolady», -dep málim etti qoǵammen baılanys bóliminen. 

Eske sala ketelik, buǵan deıin Atyraý munaı óńdeý óńdeý zaýytynda kómirsýtek gazy aýaǵa jiberilgenin habarlaǵan edik.