Atyraý munaı óńdeý zaýytynda ekologııalyq zań buzý anyqtaldy
ÓSKEMEN. KAZINFORM - Atyraý munaı óńdeý zaýytynda jospardan tys tekserý ekologııalyq talaptardyń buzylýyn anyqtady.
Atyraý oblysynyń ekologııa departamenti Atyraý munaı óńdeý zaýytynda jospardan tys tekserý júrgizdi. Tekseris turǵyndardyń aýa sapasyna qatysty kóptegen shaǵymynan týyndady.
Tekserý barysynda birqatar ekologııalyq zań buzý anyqtaldy.
— Shyǵaryndylardy esepteý júrgizilmegen jáne ELOÝ-AT-2 (№ 2 atmosferalyq tútik peshi bar elektrlik tuzsyzdandyrý qondyrǵysy) jáne ELOÝ-AVT-3 (№ 3 atmosferalyq-vakýýmdyq tútik peshi bar elektrlik tuzsyzdandyrý qondyrǵysy) keıbir tehnologııalyq peshteri, sondaı-aq keshiktirilgen kokstaý qondyrǵysynyń rezervýarlary úshin ruqsat etilgen shyǵaryndylar standarttary anyqtalmaǵan.
Sonymen qatar, 2026 jyldyń 25 tamyzynda jáne 2-7 qyrkúıegi aralyǵynda kúkirtti qalpyna keltirý qondyrǵysynda (QKQ) jáne katalıtıkalyq krekıng qondyrǵysynda (KKQ) bolǵan tótenshe jaǵdaılar nátıjesinde alaý qondyrǵysyna apattyq gaz shyǵaryndylary bolǵany anyqtaldy. Osy kezeńderde jaǵylǵan gazdyń jalpy massasy 100 tonnadan asty. Jospardan tys toqtap qalýlar men jóndeý jumystary da tirkeldi, — delingen Ekologııa mınıstrliginiń habarlamasynda.
Tómendegi óndiris nysandaryndaǵy jeke kózderdegi ónerkásiptik shyǵaryndylardy aspaptyq baqylaý kezinde kómirtegi totyǵy, azot oksıdi jáne azot dıoksıdi boıynsha belgilengen shyǵaryndylar normalarynyń asyp ketýi tirkeldi:
— HKÓ (hosh ıisti kómirsýtek óndirisi) quramyna kiretin benzoldy qalpyna keltirý blogy bar CCR (úzdiksiz katalızator regeneratsııasy) katalıtıkalyq rıformıng qondyrǵylary;
— JjEEÓ (jylý jáne elektr energııasyn óndirý);
— BDGQ-2 jeńil benzın ızomerleý qondyrǵysy (№ 2 benzın men dızel otynyn gıdrotazartý qondyrǵysy), ataýy 3211.
Tekserý barysynda avtomattandyrylǵan shyǵaryndylardy baqylaý júıesin paıdalaný jáne qolaısyz meteorologııalyq jaǵdaılar kezeńinde statsıonarlyq kózderden shyǵaryndylardy azaıtý sharalaryn júzege asyrý talaptarynyń buzylýy anyqtaldy.
QR Ákimshilik quqyq buzýshylyq týraly kodeksiniń 759-babyna sáıkes, ınvestorlar tizilimine engizilgen ınvestorlarǵa qatysty ákimshilik quqyq buzýshylyq týraly isterdi qozǵaý týraly sheshimder prokýrordyń kelisimine jatady.
2026 jyldyń 1 qazanynda prokýror ákimshilik quqyq buzý týraly isterdi qozǵaý týraly sheshimderdi kelisildi. Іs materıaldary qaraý jáne sheshim qabyldaý úshin sotqa joldandy.
Sonymen qatar, qylmystyq quqyq buzýshylyq belgileriniń bar-joǵyn anyqtaý jáne tıisti protsessýaldyq sheshim qabyldaý úshin tekserý materıaldary quqyq qorǵaý organdaryna joldandy.
Aıta ketelik Bozymbaev Atyraý ekologııasyna qatysty bir aıda naqty sheshim qabyldaýdy tapsyrǵan edi.
