Atyraý munaı óńdeý zaýytyna 520 mln teńge aıyppul salyndy
ATYRAÝ.KAZINFORM — Atyraý munaı óńdeý zaýytyna júrgizilgen jospardan tys tekseris kezinde ekologııalyq talaptardyń buzylǵany jáne apattyq jaǵdaı týraly habarlamaǵany belgili bolǵan. Sot sheshimine sáıkes kásiporyn 520 mln teńge aıyppul arqalaǵan.
QR ETRM Ekologııalyq retteý jáne baqylaý komıteti tóraǵasynyń orynbasary Álibek Bekmuhambetovtiń aıtýynsha, tekseriske qala turǵyndarynyń aýadaǵy jaǵymsyz kúkirtsýtek ıisine jappaı shaǵymdanýy sebep bolǵan.
— Tekseris nátıjesinde úsh hattama toltyryldy. Mamandar aýaǵa birqatar shyǵaryndynyń bekitilgen normadan artyq jiberilgenin anyqtady. Zaýyttan shyqqan sarqyndy sý ekologııalyq ruqsatsyz jerge tógilgeni belgili boldy. Qazirgi ýaqytta kásiporyn bul tekseristiń qorytyndysymen kelispeı otyr, — dedi Álibek Bekmuhambetov.
Eske salaıyq, 25 qańtarda Atyraýdaǵy birqatar eldi meken aýmaǵynda kúkirtsýtek shekti normadan asyp ketken edi.
Keıin Atyraý oblysy boıynsha ekologııa departamenti osy jaǵdaıdan keıin tekseris júrgiziletinin málimdedi.
Aqpan aıynyń sońynda Atyraý oblysynyń sanıtarııalyq-epıdemıologııalyq baqylaý departamenti tabıǵı resýrstar jáne tabıǵat paıdalanýdy retteý basqarmasynyń usynysy negizinde «Qalalyq jáne aýyldyq eldi mekenderdegi, ónerkásiptik uıymdar aýmaqtaryndaǵy atmosferalyq aýanyń gıgıenalyq normatıvterin bekitý týraly» № QR DSM-70 buıryǵyna sáıkes kelmeýine baılanysty, Qazaqstan Respýblıkasynyń Ákimshilik quqyq buzýshylyq týraly kodeksiniń 425-baby, 1 bóligimen 1600 AEK kóleminde aıyppul salǵan edi.
Naýryzda Atyraý oblysy boıynsha ekologııa departamenti Atyraý munaı óńdeý zaýytynda byltyr jeltoqsan aıynda jáne bıyl qańtarda birneshe tehnologııalyq qondyrǵy isten shyǵyp, nátıjesinde fakel arqyly atmosferalyq aýaǵa 40 myń tekshe metr otyn gazy ekologııalyq ruqsatsyz shyǵarylǵanyn málimdedi.
