Atyraý munaı óńdeý zaýytyna 12 mln teńge aıyppul salyndy

Atyraý munaı óńdeý zaýytyna tehnologııalyq gazdy aýaǵa jaqqany úshin 12 mln teńge aıyppul salyndy. Alaıda, kásiporyn sottyń bul qaýlysymen kelispeı, apellıatsııalyq shaǵym túsirgen, dep habarlaıdy Kazinform agenttigi. 

Atyraý oblystyq ekologııa departamentiniń baspasóz qyzmeti málim etkendeı, «AMÓZ» JShS-ǵa ekologııalyq zańnamalar talaptarynyń saqtalýyna qatysty jospardan tys tekserý júrgizilgen. 

«Jospardan tys tekserý kezinde bıylǵy 3 shildede saǵat 17:25-te Atyraý munaı óńdeý zaýytynda elektr qýaty sóngeni rastaldy. Sonyń saldarynan ELOÝ-AT-2 qondyrǵysyn qospaǵanda, zaýyttyń tehnologııalyq qondyrǵylarynyń jumysy apatty jaǵdaıda toqtaǵan. Jergilikti ýaqytpen saǵat 17:47-de zaýytqa elektr qýatyn berý tolyǵymen óshken. Osyǵan baılanysty «PAZ» avtomattandyrylǵan avarııalyq qorǵanysy iske qosylyp, alaý júıesinde tehnologııalyq gaz jaǵylǵan», - dep habarlady departamenttiń baspasóz qyzmeti. 

Tekserý qorytyndysymen «AMÓZ» JShS-ǵa qatysty QR Ákimshilik quqyq buzýshylyq týraly kodeksiniń 328-babynyń 3-bóligimen hattama toltyrylyp, odan ári qaraý úshin Atyraý qalasynyń ákimshilik quqyq buzýshylyqtar jónindegi mamandandyrylǵan sotyna joldanǵan. Sottyń 2023 jylǵy 31 tamyzdaǵy qaýlysymen «AMÓZ» JShS-ǵa tıisti emıssııa kóziniń jumysyna ekologııalyq ruqsattyń qoldanylýyn toqtatpaı, 12 mln 14 myń 550 teńge mólsherinde aıyppul salyndy. 

«Sot qaýlysymen kelispegen «AMÓZ» JShS Atyraý oblystyq sotyna apellıatsııalyq shaǵym túsirdi. Alaıda, Atyraý oblystyq sotynyń qaýlysymen birinshi satydaǵy sottyń qaýlysy ózgerissiz qaldyrylyp, «AMÓZ» JShS-niń shaǵymy qanaǵattandyrylýdan bas tartyldy», - dep málim etti departamenttiń baspasóz qyzmetinen.

Eske sala ketelik, budan buryn Atyraý munaı óńdeý zaýytyndaǵy tekserý qarashaǵa deıin jalǵasatynyn jazǵan edik.