Atyraý munaı óńdeý zaýyty jóndeýge jabyldy

ATYRAÝ. KAZINFORM — Búginnen bastap, ıaǵnı 1-25 qazan aralyǵynda Atyraý munaı óńdeý zaýyty josparly jóndeýge jumysyn toqtatty. Bul jaıynda Energetıka mınıstrligi habarlady.

Josparly-saqtandyrmalyq jóndeý (JSJ) aıasynda zaýytta myń dana jabdyqtarǵa saraptama jáne kýálandyrý jumystary júrgiziledi, ıaǵnı, 1174 dana ydys pen apparattar, 46 pesh, 1458 dana tehnologııalyq turbalar tekserýden ótedi.

Sonymen qatar 316 tonn katalızator aýystyrylady. Eń sheshýshi ári qıyn operatsııa retinde jaı kokstený qondyrǵysy reaktorlarynyń konýstyq túbin aýystyrý jumystary bolmaq. Ol úshin zaýytta árqaısysynyń kóterý qabileti 750 tonn bolatyn eki biregeı kran jóndeledi.
JSJ barysynda reaktorlarda jabdyqtardyń bolashaqta senimdiligi úshin boljamdy dıagnostıkalaý ınnovatsııalyq júıesi de engiziledi. Osy jumystardy atqarýǵa tutastaı alǵanda 1880 maman men 62 arnaıy tehnıka jumyldyrylady.

Іshki naryqta janar-jaǵarmaı turaqtylyǵyn saqtaý jáne munaı ónimderin jóneltýdi qamtamasyz etý maqsatynda zaýyt JSJ kezinde taýarly ónimniń jetkilikti qoryn qalyptastyrý sharalaryn alady.

QazMunaıGaz aqparatyna sáıkes, jýyrda zaýytqa barǵan QMG basqarma tóraǵasy Ashat Hasenov zaýyt aldyna jyldyq óńdeýdi 1,6 mln tonnaǵa jetkizip, ár jóndeý jıiligin úsh jylǵa uzartýdy tapsyrǵan.

Eske sala keteıik, biz buǵan deıin Atyraý munaı óńdeý zaýytynyń burynǵy basshysy mezgilsiz dúnıeden ótkenin habarlaǵan edik.