Atyraý munaı óńdeý zaýyty tekseris nátıjesimen kelispeıtinin málimdedi
ATYRAÝ. KAZINFORM – Atyraý munaı óńdeý zaýyty ekologııa departamentiniń jospardan tys tekseris nátıjesine qatysty óz ustanymyn jarııalady. Kásiporyn ELTQ-AT-2 jáne ELTQ-AVT-3 qondyrǵylarynyń tehnologııalyq peshteri boıynsha qajetti esepteýler júrgizilgenin málimdedi.
Buǵan deıin Ekologııa departamenti zaýytta shyǵaryndylarǵa esepteý júrgizilmegenin, ELTQ-AT-2 (№ 2 atmosferalyq tútik peshi bar elektrlik tuzsyzdandyrý qondyrǵysy) jáne ELTQ-AVT-3 (№ 3 atmosferalyq-vakýýmdyq tútik peshi bar elektrlik tuzsyzdandyrý qondyrǵysy) keıbir tehnologııalyq peshteri, sondaı-aq keshiktirilgen kokstaý qondyrǵysynyń rezervýarlary úshin ruqsat etilgen shyǵaryndylar standarttary anyqtalmaǵanyn málimdegen edi.
Sonymen qatar 2026 jyldyń 25 tamyzynda jáne 2-7 qyrkúıegi aralyǵynda kúkirtti qalpyna keltirý qondyrǵysynda (QKQ) jáne katalıtıkalyq krekıng qondyrǵysynda (KKQ) bolǵan tótenshe jaǵdaılar nátıjesinde alaý qondyrǵysyna apattyq gaz shyǵaryndylary bolǵany anyqtaldy. Osy kezeńderde jaǵylǵan gazdyń jalpy massasy 100 tonnadan asty.
Kásiporyn bul tujyrymdy negizsiz dep sanaıdy. Zaýyttyń málimetinshe, qorshaǵan ortany qorǵaý salasyndaǵy ýákiletti organ bergen qoldanystaǵy ekologııalyq ruqsat aıasynda tıisti normatıvtik esepteý júrgizilgen. ELTQ-AT-2 jáne ELTQ-AVT-3 qondyrǵylarynyń tehnologııalyq peshterine arnalǵan ShRSh jobasyn ázirleý kezinde otyn gazyn, tabıǵı gazdy jáne pesh otynyn jaǵýdan týyndaıtyn shyǵaryndylar esepke alynǵan.
Osy shyǵaryndylar kózderi boıynsha normatıvter Qazaqstanda bekitilgen ádistemelerge sáıkes belgilengen.Zaýyt qajetti esepteýler men normatıvtik materıaldardyń bar ekenin rastaıtyn tehnıkalyq jáne jobalyq qujattamany ýákiletti memlekettik organdarǵa usynýǵa daıyn ekenin atap ótti.
- Qolaısyz meteorologııalyq jaǵdaılar (QMJ) kezindegi is-sharalarǵa qatysty aıtar bolsaq, AMÓZ QMJ bastalǵany týraly tıisti habarlama alǵan kezde bekitilgen Josparǵa sáıkes lastaýshy zattar shyǵaryndylaryn azaıtý sharalaryn júzege asyrady. Josparda shyǵaryndylardy tómendetýge baǵyttalǵan naqty jumystar kórsetilgen. Esepteýlerge sáıkes, atalǵan is-sharalar shyǵaryndylar mólsherin 35 370,1 g/s-tan 20 664,3 g/s-qa deıin, ıaǵnı shamamen 42%-ǵa azaıtýǵa múmkindik beredi, - dep habarlady zaýyt.
100 tonnadan astam gaz alaýda jaǵylǵan
Kásiporyn 100 tonnadan astam gazdyń alaý qondyrǵysynda jaǵylýyna qatysty da aqparat usyndy.
- Gazdy alaý qondyrǵysyna jiberý – tehnologııalyq protsestiń bir bóligi jáne ol ádis sondaı-aq tehnologııalyq qondyrǵylardyń jumysynda aqaýlar týyndaǵan kezde qoldanylady. Mundaı jumys rejımi kezinde alaý júıesi gazdyń qaýipsiz jaǵylýyn qamtamasyz etedi jáne jobaǵa sáıkes ónerkásiptik qaýipsizdik júıesiniń ajyramas bóligi sanalady, - dep tolyqtyrdy kásiporynnyń baspasóz qyzmeti.
Sondaı-aq Atyraý munaı óńdeý zaýyty 2026 jyldyń 2–7 qyrkúıek aralyǵynda sanıtarııalyq-epıdemıologııalyq baqylaý salasyndaǵy ýákiletti organ zaýyttyń sanıtarııalyq-qorǵaý aımaǵy shekarasynda kúkirtsýtek boıynsha normatıvten asý faktilerin tirkemegenin habarlady.
Kásiporyn ekologııalyq talaptardy saqtaý qajettiligin moıyndaıtynyn jáne júrgizilip jatqan baqylaý is-sharalary aıasynda memlekettik organdarmen ózara is-qımyl jasap jatqanyn atap ótti.
Atyraý MÓZ zańnamada kózdelgen rásimderdiń aıaqtalyp, sottyń tıisti quqyqtyq baǵa berýin kútetinin málimdedi.
Búginde Atyraý munaı óńdeý zaýyty 2030 jylǵa deıin keshendi ekologııalyq ruqsat alýǵa tyrysyp jatyr. Qoǵamdyq tyńdaý 9 qazanǵa josparlanyp otyr.
