Atyraý munaı óńdeý zaýyty mańyndaǵy turǵyndardy kóshirý úshin jumys toby qurylady
ATYRAÝ. KAZINFORM — Atyraý munaı óńdeý zaýyty sanıtarlyq-qorǵaý aımaǵynyń jańa shekarasyn bekitý jumystary aıaqtalýǵa jaqyn. Qazir joba sanıtarııalyq-epıdemıologııalyq baqylaý organdarymen kelisý kezeńine daıyndalyp jatyr.
AMÓZ-diń eńbekti, qorshaǵan ortany qorǵaý jáne azamattyq qorǵanys departamenti dırektorynyń mindetin atqarýshy Arman Dımuqashevtiń aıtýynsha, buǵan deıin qoldanysta bolǵan sanıtarlyq-qorǵaý aımaǵy tabıǵat qorǵaý prokýratýrasynyń usynysynan keıin kúshin joıǵan. Osyǵan baılanysty 2025 jyly sanıtarlyq-qorǵaý aımaǵynyń jańa shekarasyn anyqtaý úshin atmosferalyq aýany qorǵaý jónindegi respýblıkalyq ǵylymı-zertteý ınstıtýty tartylǵan.
— Zertteý bir jyl boıy júrgizildi. Biz tórt mezgildi — kóktem, jaz, kúz jáne qysty tolyq qamtydyq. Mamandar jeldiń baǵytyn, zııandy zattardyń taralýyn jáne olardyń túrlerin zerttedi. Sonyń nátıjesinde sanıtarlyq-qorǵaý aımaǵynyń jańa shekarasy aıqyndaldy. Qazir topografııalyq túsirilimniń sońǵy kezeńin aıaqtap jatyrmyz. Shilde aıynyń sońyna deıin jobany oblystyq sanıtarııalyq-epıdemıologııalyq baqylaý departamentine kelisýge joldaımyz. Sonymen qatar protsesti jedeldetý úshin turǵyndardy kóshirý jónindegi is-sharalar jospary ázirlendi. Ol qazir Atyraý qalasynyń ákimdiginde qaralyp jatyr. Joba kelisilgennen keıin barlyq múddeli memlekettik organnyń qatysýymen jumys toby qurylyp, sanıtarlyq-qorǵaý aımaǵyna kiretin turǵyn úıler men jer ýchaskeleriniń naqty sany anyqtalady, — dedi Arman Dımuqashev.
AMÓZ málimetinshe, búginde sanıtarlyq-qorǵaý aımaǵynyń kólemi 805 gektardy quraıdy. Joba sanıtarııalyq-epıdemıologııalyq baqylaý departamentimen kelisilgennen keıin Atyraý qalasynyń ákimdigine usynylady. Keıin arnaıy jumys toby qurylyp, sanıtarlyq-qorǵaý aımaǵyna enetin turǵyn úıler men jer telimderiniń naqty tizimi jasalady. Atyraý qalasy ákimdiginiń resmı ókili Ǵasyrbek Tólegenniń aıtýynsha, kóshirý rásimi Qazaqstan Respýblıkasynyń Jer kodeksine sáıkes júrgiziledi.
— Naqty mekenjaılar anyqtalǵannan keıin barlyq rásimdi Atyraý qalasynyń ákimdigi júrgizedi. Turǵyndarǵa habarlaý, qajetti qujattardy rásimdeý jumystary tolyqtaı ákimdik quzyrynda bolady. Keıin Qazaqstan Respýblıkasynyń Jer kodeksiniń talaptaryna sáıkes anyqtalǵan aýmaqtaǵy nysandar memleket muqtajdyǵyna alynady. Osydan keıin táýelsiz sarapshylar ár nysannyń naryqtyq qunyn baǵalap, ótemaqy mólsherin anyqtaıdy, — dedi ol.
Qazirgi ýaqytta sanıtarlyq-qorǵaý aımaǵyna naqty qansha turǵyn úı men jer ýchaskesi enetini, sondaı-aq olardy kóshirýge qansha qarajat qajet bolatyny belgisiz.
Aı basynda oblys prokýratýrasy óndiris ornynyń sanıtarlyq-qorǵaý aımaǵynda ornalasqan 80 úıdi kóshirý máselesi qarastyrylyp jatqanyn málimdegen edi.
