Atyraý munaı óńdeý zaýyty mańyndaǵy 80 úı kóshirilýi múmkin
ATYRAÝ. KAZINFORM — Atyraý munaı óńdeý zaýytynyń sanıtarııalyq-qorǵaý aımaǵynda ornalasqan 80 turǵyn úıdiń turǵyndaryn qaýipsiz jerge kóshirý máselesi jergilikti atqarýshy organda qaralyp jatyr. Bul týraly oblystyq prokýratýra málim etti.
Quqyq qorǵaý organynyń málimetinshe, prokýratýra aktisi negizinde Atyraý munaı óńdeý zaýytynyń jańa sanıtarııalyq-qorǵaý aımaǵy bekitildi. Atalǵan aýmaqta 200-den astam adam turady.
— Munaı óńdeý zaýytynyń aınalasyndaǵy qaýipti aımaqqa qatysty 10 jyldan beri sozylǵan ekologııalyq másele sheshimin tapty. Qazirgi tańda 80 turǵyn úıdiń turǵyndaryn qaýipsiz jerge kóshirý máselesi sheshilýde, — dep habarlady prokýratýra.
Sonymen qatar ekologııa salasyndaǵy prokýratýra alqasynyń kógaldandyrý máselesine arnalǵan sheshimimen jaýapty laýazymdy tulǵalar aıqyndalyp, óńirde «jasyl beldeýdi» qalyptastyrý tujyrymdamasy men ózge de is-sharalar ázirlendi.
— Buǵan deıin aǵashtar sýarý men kútim joq shalǵaı aýmaqtarǵa otyrǵyzylyp, olardyń qýraýyna ákelgen. Endi prokýratýra barlyq tartylǵan kásiporyn men memlekettik organdardyń jumysyn júıelep, óńirdiń iri eldi mekenderin kezeń-kezeńimen tolyq kógaldandyrýǵa jáne atmosferalyq aýanyń sapasyn jaqsartýǵa múmkindik jasady, - dep tolyqtyrdy oblys prokýratýrasynyń baspasóz qyzmeti.
Buǵan deıin Atyraýda jasyl jelekter esepke alynbaǵan, dendrologııalyq jospar jasalmaǵanyn jazǵan edik.
Sondaı-aq óńirde jumys isteıtin munaı-gaz kompanııalary kógaldandyrý mindettemesin 0,4–18,5% ǵana oryndaǵan.
