Atyraý munaı óńdeý zaýyty qondyrǵydan shyqqan qara tútinge qatysty túsinikteme berdi
ATYRAÝ. KAZINFORM – Atyraý munaı óńdeý zaýytynyń qubyrynan shyqqan qara tútinge uqsas qoıý bý áleýmettik jelide qyzý talqylandy. Kásiporyn ókilderi onyń sý býy ekenin málimdedi.
Peretaska, Jılgorodok jáne Balyqshy yqshamaýdandarynyń turǵyndary aýa sapasyna alańdaýshylyq bildirýde.
Kásiporynnyń málimetinshe, keshki ýaqytta katalıtıkalyq krekıng qondyrǵysynyń BELCO skrýbberi qubyrynan shyǵatyn sý býy qoıý tútin bolyp kórinýi múmkin. Zaýyt ókilderi muny jaryqtyń túsýimen baılanystyrdy.
- Kúnniń ornalasýy men kórý buryshyna qaraı aq bý sur nemese qoıý tústi bolyp kórinýi múmkin. Qubyrǵa sol ýaqytta basqa tustan qaraǵanda, mundaı áser baıqalmaýy múmkin.Zaýyt shtattyq rejımde jumys istep tur. Jabdyqtyń jumysynda avarııalyq jaǵdaılar men tehnologııalyq aýytqýlar tirkelgen joq,-dep habarlady zaýyttyń baspasóz qyzmeti.
Aýa sapasyn tikeleı qarap otyrýǵa múmkindik beretin Air.kz qosymshasyndaǵy derekke súıensek, 30 qazan saǵat 10:00-de «Vostok» yqshamaýdanyndaǵy №109 baqylaý beketinde kúkirtsýtek kontsentratsııasy 10,6 mkg/m³ bolǵan. Monıtorıng qosymshasynda bul kórsetkish shekti ruqsat etilgen kontsentratsııadan 1,3 ese joǵary dep kórsetilgen. 07:00-de «Hımposelok ANPZ» baqylaý núktesinde kúkirtsýtek mólsheri 5,0 mkg/m³ bolǵan. Bul kórsetkish qosymshada shekti kontsentratsııanyń 0,6 ese artyq ekeni belgili boldy.
Buǵan deıin ekologııa departamenti Atyraý munaı óńdeý zaýytyn jospardan tys tekseris júrgizip, birqatar talaptyń buzylǵanyn anyqtaǵan edi. 2026 jyldyń 25 tamyzynda jáne 2-7 qyrkúıegi aralyǵynda kúkirtti qalpyna keltirý qondyrǵysynda (QKQ) jáne katalıtıkalyq krekıng qondyrǵysynda (KKQ) bolǵan tótenshe jaǵdaılar nátıjesinde alaý qondyrǵysyna apattyq gaz shyǵaryndylary bolǵany anyqtaldy. Osy kezeńderde jaǵylǵan gazdyń jalpy massasy 100 tonnadan asqan.
Keıin kásiporyn tekseris nátıjesine qatysty óz ustanymyn jarııalady.
