Atyraý munaı óńdeý zaýyty aıyppul arqalady
ATYRAÝ. KAZINFORM — Atyraý munaı óńdeý zaýytyna 6 mln 920 myń teńge aıyppul salyndy.
Atyraý oblysynyń sanıtarııalyq-epıdemıologııalyq baqylaý departamenti tabıǵı resýrstar jáne tabıǵat paıdalanýdy retteý basqarmasynyń usynysy negizinde QR Ákimshilik quqyq buzýshylyq týraly kodeksiniń 425-baby, 1 bóligi ıaǵnı halyqtyń sanıtarııalyq-epıdemıologııalyq salamattylyǵy salasyndaǵy zańnamasynyń talaptaryn, sondaı-aq gıgıenalyq normatıvterdi, tehnıkalyq reglamentterdi adam densaýlyǵyna zııan keltirýge ákep soqpaǵan buzýshylyq boıynsha kásiporynǵa Atyraý munaı óńdeý zaýytyna 1600 AEK kóleminde aıyppul salǵanyn rastady.
Oblystyq tabıǵı resýrstar jáne tabıǵat paıdalanýdy retteý basqarmasynyń basshysy Erbolat Omarov baspasóz brıfınginde bul aıyppen zaýyt kelispeı, sottasyp jatqanyn málimdedi.
— Qazirgi ýaqytta AMÓZ mekemesi aıyppulmen kelispeı, sot protsesi ótip jatyr. Ekologııa departamenti bizdiń hatymyzdyń negizinde tekseris ashyp, tekseris aıaqtalyp, qorytyndylaý jumystary júrip jatyr. Jalpy jeldiń baǵytyna baılanysty naqty sheshim qabyldaý qıyndaý. Bul aýmaqta tek bir mekeme emes, 2-3 kompanııa ornalasqan. Jaǵymsyz ıis AMÓZ-den shyqty dep kesip aıta almaımyz. Qańtarda bolǵan jaǵdaı boıynsha jel shyǵys-ońtústik baǵyttan soqty, — dedi Atyraý oblystyq tabıǵı resýrstar jáne tabıǵat paıdalanýdy retteý basqarmasynyń basshysy Erbolat Omarov.
Eske salaıyq, 25 qańtar kúni turǵyndardyń narazylyǵynan keıin Qazgıdromet RMK Atyraý oblystyq fılıalynyń mamandary atmosferalyq aýanyń sapasyn ólsheý úshin synama alǵan.
Zertteý nátıjesinde kúkirtsýtek kontsentratsııasynyń shekti ruqsat etilgen mólsherden birneshe ese artyq ekeni anyqtalǵan edi. Atap aıtqanda, Atyraý qalasyna qarasty Tasqala aýylynda bul kórsetkish 17,5 ese, Tasqala aýylyna irgeles aýmaqta 15 ese, al Hımposelok aýdanynda 36,3 ese artyq tirkelgen.
Osy jaǵdaıdan keıin Atyraý oblystyq ekologııa departamenti AMÓZ-ge qatysty tekseris bastaǵan. Ekologter bul jumysty osy aptanyń sońyna deıin aıaqtap, qorytyndysyn qosymsha habarlaıtynyn málimdedi.