Atyraý munaı óńdeý zaýyty aýaǵa 5,3 myń tonna lastaýshy zattar shyǵarǵan
ATYRAÝ. KAZINFORM – Atyraý munaı óńdeý zaýyty bıylǵy 6 aıda atmosferaǵa 5,3 myń tonna lastaýshy zattar shyǵarǵan. Biraq, bul 16 myń 224 tonnany quraıtyn shekti mólsherden 3 esege az.
Atyraý munaı óńdeý zaýytynyń bas dırektory Ǵalymjan Jýsanbaevtyń aıtýynsha, sý tasqynyna baılanysty jarııalanǵan tótenshe jaǵdaı rejıminiń kásiporyn jumysyna keri áseri tımegen.
«Zaýyt jumysy toqtaǵan joq, shtattyq rejımde jalǵasyp jatyr. Bıylǵy 6 aıda 2 mln 911 myń tonna shıkizattyq munaı óńdeldi. Taýarly ónim shyǵarý kólemi 2 mln 632 myń tonnany qurady. Onyń ishinde 786,8 myń tonna janarmaı, 879,9 myń tonna dızel otyny, 95,3 myń tonna áýe otyny, 106,0 myń tonna suıytylǵan gaz bar. Óńdelgen shıkizattyń 68,6%-y – ashyq tústi munaı ónimderi», - deıdi Ǵalymjan Jýsanbaev.
Onyń deregine qaraǵanda, Atyraý munaı óńdeý zaýytynda atmosferaǵa 5 myń 357 tonna lastaýshy zattar shyǵarylǵan.
«Bul 16 224 tonnany quraıtyn shekti kórsetkishten 3 esege az. Mamyr aıynda Tazalyq jobasy aıasynda mehanıkalyq tazartý qondyrǵylaryn rekonstrýktsııalaý aıaqtaldy. Qazir tazartý kesheni tolyq qýatynda jumys istep tur. Býlaný alańdarynyń 3 jáne 4-sektoryn rekýltıvatsııalaý jumysy ázirge toqtatyldy. Atyraý munaı óńdeý zaýyty men men Atyraý oblysynyń ákimdigi arasynda zaýyttan shyǵarylatyn aǵyndy sýdy qalalyq kárizdik tazartý stansasyna jiberý týraly kelissózder jalǵasyp jatyr», - dep málim etti Ǵalymjan Jýsanbaev.
Bas dırektordyń aıtýyna qaraǵanda, kúzde zaýytta jyl saıynǵy josparly aldyn ala tekserý jumystary júrgiziledi. Qazir oǵan daıyndyq sharalary qolǵa alynǵan.
Eske sala ketelik, budan buryn Atyraý munaı óńdeý zaýytynyń jumystan qýylǵan bas dırektory ornyna qaıta otyrǵanyn habarlaǵan bolatynbyz.
