Atyraý munaı óńdeý zaýyty 2026–2028 jyldary bıoalýantúrlilikti zertteý baǵdarlamasyn iske asyrady

Atyraý oblysyna jumys sapary aıasynda Qazaqstan Respýblıkasynyń Ekologııa jáne tabıǵı resýrstar mınıstri E. Nysanbaev Atyraý munaı óńdeý zaýytynda bolyp, kásiporynnyń iske asyrylyp jatqan tabıǵat qorǵaý is-sharalarymen jáne ekologııalyq kórsetkishterimen tanysty.

Kásiporyn qorshaǵan ortaǵa áser etý deńgeıin dáıekti túrde tómendetedi. «Jasyl Qazaqstan» ulttyq jobasy sheńberinde atmosferaǵa lastaýshy zattar shyǵaryndylarynyń kólemi 22 % — ǵa-2020 jylǵy 20 123 tonnadan 2025 jylǵa qaraı 15 642 tonnaǵa deıin qysqardy.

Ekologııalyq ruqsatqa sáıkes 2026 jylǵa shyǵaryndylardyń ruqsat etilgen kólemi 14 637 tonnaǵa deıin tómendetildi.

AMÓZ óndiristik obektilerinde emıssııalar monıtorınginiń avtomattandyrylǵan júıesi (ASM) engizildi, ol táýlik boıy negizgi lastaýshy zattardyń shoǵyrlanýyn jáne tehnologııalyq parametrlerdi baqylaıdy. Ortasha derekter ár 20 mınýt saıyn Qorshaǵan orta men tabıǵı resýrstardyń jaı-kúıi týraly Ulttyq derekter bankine beriledi.

Sonymen qatar, kásiporynda sanıtarlyq-qorǵaý aımaǵynyń perımetri boıynsha ornalasqan atmosferalyq aýanyń sapasyn baqylaýdyń tórt avtomatty stantsııasyn qamtıtyn ekologııalyq monıtorıng júıesi jumys isteıdi. Ekoposttardan alynǵan derekter saǵat saıyn «Qazgıdromet» RMK-ǵa kelip túsedi, AirKz qosymshasyna biriktiriledi jáne qala men kásiporynnyń aqparattyq LED-ekrandarynda kórsetiledi. Keleshekte atmosferalyq aýanyń sapasyn baqylaýdyń tıimdiligin arttyrý úshin monıtorıng júıesin jańǵyrtý kózdelgen.

Zaýytta tabıǵatty qorǵaý is-sharalaryn iske asyrýǵa erekshe kóńil bólinedi. «Tazalyq» jobasy aıasynda aǵyndy sýlardy mehanıkalyq tazartý qondyrǵysyn qaıta jańartý aıaqtaldy. Jańǵyrtýdyń arqasynda aǵyndy sýlarmen keletin lastaýshy zattardyń kólemi azaıdy, al tazartylǵan aǵyndy sýlardy qaıta paıdalaný 258 myń tekshe metrge jetti. Sondaı-aq, býlandyrǵysh toǵannyń birinshi jáne ekinshi sektorlaryn qalpyna keltirý jumystary júrgizildi. Qalǵan sektorlar boıynsha jumystar jobanyń kelesi kezeńi iske asyrylǵannan keıin oryndalatyn bolady.

Budan basqa, 2026-2028 jyldary AMÓZ óziniń áser etý aýmaǵynda bıoalýantúrlilikti zertteý jáne monıtorıngteý baǵdarlamasyn iske asyrady. Baǵdarlama halyqaralyq ekologııalyq standarttarǵa, Qazaqstan Respýblıkasynyń bıoalýantúrliligin saqtaý jáne ornyqty paıdalaný jónindegi Tujyrymdamaǵa, sondaı-aq «QazMunaıGaz» UK AQ ekologııalyq strategııasyna sáıkes keledi jáne óndiristiń qorshaǵan ortaǵa áserin odan ári tómendetýge baǵyttalǵan.

Aıta ketelik Atyraý munaı óńdeý zaýytyndaǵy josparly jóndeý merziminen buryn aıaqtalǵan edi.