Atyraý munaı óńdeý óńdeý zaýytynda kómirsýtek gazy aýaǵa jiberildi

ATYRAÝ. KAZINFORM – Atyraý munaı óńdeý zaýytyndaǵy býtenderdi olıgomerızatsııalaý qondyrǵysynan kómirsýtek gazy aýaǵa jiberildi.

«AMÓZ» JShS-niń qoǵammen baılanys bólimi oqıǵanyń keshe, 4 qyrkúıekte bolǵanyn rastady.

«Atyraý munaı óńdeý zaýytynda 4 qyrkúıekte saǵat 21:30-da qondyrǵynyń E-1604-jylý almastyrǵysh apparatynan gaz shyǵýy sebebinen býtenderdi olıgomerızatsııalaý qondyrǵysy toqtatyldy. Týyndaǵan jaıtty joıý josparyna sáıkes reaktor blogy júıesin gaz qaldyqtarynan alaý qubyryna jiberý arqyly bosatý qajet boldy. Alaýdaǵy kómirsýtek gazy janǵan kezde zııandy qospalar túzilmeıdi. Quramy boıynsha bul gaz kúndelikti ómirde qoldanylatyn turmystyq suıytylǵan gazǵa uqsas. Býtendi olıgomerızatsııalaýdyń tehnologııalyq qondyrǵysy suıytylǵan munaı gazynyń qanyqpaǵan qosylystaryn polımer benzın men polımerkerosınge aınaldyrýǵa arnalǵan. E-1604 jylý almastyrǵysh apparaty – hımııalyq reaktsııalardyń tıimdi júrýi úshin qajetti temperatýrany ustap turýǵa kómektesedi. Sodan keıin alynǵan olıgomerler ártúrli munaı ónimderin, sonyń ishinde janarmaı men joǵary oktandy otyn komponentterin óndirý úshin qoldanylady», -dep habarlady qoǵammen baılanys bóliminen.

Kásiporyndaǵy jaǵdaı baqylaýǵa alynǵan. Aýadaǵy kúkirtsýtek, azot dıoksıdi jáne kúkirt dıoksıdi ruqsat etilgen shekti normalardan aspaǵan.

«Qazir gaz jiberý faktisi joıyldy. Qondyrǵyny iske qosý júrgizilip jatyr. Tehnologııalyq qondyrǵy shtattyq óndiristik rejımge shyǵady. AMÓZ-de modernızatsııadan keıin kúkirt dıoksıdi shyǵaryndylary 12 esege azaıdy. Tazalyq jobasyn iske asyrýdyń nátıjesinde zaýyttyń ónimdiligi edáýir ósti. Munaı shlamyn óńdeý kólemi aıyna orta eseppen 12 myń tekshe metrdi quraıdy. Al, zııandy zattardyń shyǵaryndylary eń tómengi mánge deıin qysqardy. Jetildirilgen tazartý júıeleri arqyly ótetin sý býlaný óristeriniń tirshiligin qalpyna keltirýge múmkindik beretin eń qatań ekologııalyq standarttarǵa sáıkes keledi. Tazalyq jobasy sýdyń sapasyn jaqsartyp qana qoımaı, aımaqtaǵy tabıǵı tepe-teńdikti qalpyna keltirýge jaǵdaı jasady», -dep málim etti qoǵammen baılanys bóliminen.

Eske sala ketelik, budan buryn Atyraý munaı óńdeý zaýyty aýaǵa 5,3 myń tonna lastaýshy zattar shyǵarǵanyn jazǵan edik.