Atyraý muǵalimderinen para alǵan bilim salasynyń qyzmetkerlerine aıyppul salyndy

ATYRAÝ. KAZINFORM – Atyraýda bilim salasynyń qyzmetkerleri muǵalimderden para alǵan. Sot úkimimen kinálirge aıyppul salyndy. 

Sybaılas jemqorlyqqa qarsy is-qımyl agenttiginiń baspasóz qyzmetinen málim etkendeı,
Atyraý qalasyndaǵy №2 sotynda Atyraý qalalyq bilim bóliminiń sektor meńgerýshisi M.S. men basqalarǵa qatysty úkim shyǵarylǵan.

– Ol jergilikti mekteptiń biriniń ýaqytsha dırektory A.Q. arqyly 3 muǵalimnen sarapshy sanatyn bekitý úshin jalpy somasy 150 myń teńge para alǵan. Sot úkimimen kináli dep tanyldy. Kináilerge 1,4 mln teńgeden 4,5 mln teńgege deıin aıyppul túrinde jaza taǵaıyndaldy, - dep habarlady agenttiktiń baspasóz qyzmeti.

Sottalǵandar memlekettik qyzmette jáne kvazımemlekettik sektor sýbektilerinde laýazymdardy atqarý quqyǵynan ómir boıyna aıyrylady. Sot aktileri zańdy kúshine engen joq.

– QR Qylmystyq kodeksiniń 41-babyna sáıkes aıyppul belgilengen merzimde tólenbegen jaǵdaıda jaza sharasy bas bostandyǵynan aıyrýǵa aýystyrylady. QR Konstıtýtsııasynyń 77-baby 3-tarmaǵynyń 1-tarmaqshasyna jáne Qylmystyq is júrgizý kodeksiniń 19-baby 1-bóligine sáıkes qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árqaısysy kinásiz dep esepteledi, - dep málim etti agenttiktiń baspasóz qyzmetinen.

Eske sala ketelik, budan buryn Atyraý munaı óńdeý zaýytynyń eks-dırektoryna 6,9 mln teńge aıyppul salynǵanyn jazǵan edik.