Atyraý MÓZ suıytylǵan munaı gazy óndirisin qaıta bastady

ASTANA. KAZINFORM – «Atyraý munaı óńdeý zaýyty» JShS josparly jóndeý jumystaryn merziminen buryn aıaqtap, barlyq tehnologııalyq qondyrǵyny shtattyq rejimge shyǵardy. Bul týraly Energetıka mınıstrliginiń baspasóz qyzmeti habarlady. 

Qazirgi ýaqytta munaıdy bastapqy jáne ekinshi qaıta óńdeýge arnalǵan negizgi jáne qosalqy qondyrǵylar kesteden erte iske qosyldy.

— Zaýyt turaqty jumys istep, óndiristik baǵdarlamaǵa sáıkes ónim shyǵarýdy qamtamasyz etip otyr. 6–7 qarashada Atyraý MÓZ táýligine 16,8 myń tonna munaı óńdep, jobalyq qýattyń 100%-yna jetti. Osy kezeńde 10 myń tonnadan astam suıytylǵan gaz, AI-92 markaly benzın, maýsymaralyq jáne qysqy dızel otyny óndirilip, jóneltildi.

Suıytylǵan munaı gazynyń táýliktik óndirisi shamamen 700 tonna. Eldegi suıytylǵan gazdyń 11%-yn óndiretin zaýyttyń qaıta iske qosylýy ishki naryqtaǵy turaqtylyqty qamtamasyz etýge yqpal etedi. Qosymsha óndirilgen otyn kólemderi josparǵa sáıkes óńirlerge jóneltilip, aǵymdaǵy qajettilikti tolyq qamtamasyz etedi, — delingen habarlamada.

Munaı ónimderi óndirisin arttyrý jáne óńirlerdegi qorlardy tolyqtyrý jumystary jalǵasyp jatyr. Óńirlerdi suıytylǵan gaz ben benzınmen qamtamasyz etý protsesi Energetıka mınıstrliginiń turaqty baqylaýynda. 

Aıta ketelik AMÓZ-diń burynǵy bas dırektoryna qatysty qylmystyq is toqtatylǵan edi.