Atyraý metsenattary qalamgerlerdiń kitabyn shyǵarýǵa demeýshilik jasaıdy
ATYRAÝ. KAZINFORM — Atyraýdaǵy «Jumysshy mamandyǵy jáne Qazaqstan jazýshylarynyń shyǵarmalary» plenýmynda «Sóz — sybaǵa» ádebı aýktsıony ótti.
Aýktsıonda aldymen qalamgerler men metsenattar tanystyryldy. Sodan soń metsenattar avtorlardy tańdady. Metsenattardyń arasynda «Qurmet», «Parasat», «Barys» ordenderiniń ıegeri Tóken Jumaǵulov, Qazaqstannyń Eńbek Eri Vladımır Rozmetov, Qyzylqoǵa aýdanynyń qurmetti azamaty, «Qurmet» ordeniniń ıegeri Murat Sarmanov sekildi kásipkerler bar.
Máselen, Murat Sarmanov jergilikti qalamgerler Tólegen Jańabaev, Qalıolla Іzekenov, Jańaı Amantýrlın, Nazarbek Qosshıev pen Asantemir Qarshyǵaulynyń kitaptaryn shyǵarýǵa demeýshilik jasaǵan. Endi ol jergilikti aqyn, halyqaralyq «Alash» ádebı syılyǵynyń ıegeri Gúlzada Nıetqalıevany avtor retinde tańdady.
— Bala kúnimnen aýyzy dýaly qarııalardyń ónege toly áńgimesin tyńdap, aqyn-jazýshylardyń shyǵarmalaryn oqyp óstim. Ult rýhanııatyna eleýli orny bar qalamgerlerdiń ádebı kitaptaryn áli kúnge deıin oqımyn. Balalarym men nemerelerime de kitap oqýdyń paıdaly ekenin aıtyp otyramyn. Óıtkeni, kitap — jan azyǵy, - deıdi Murat Sarmanov.
Endi ol ózi tańdaǵan avtordyń kitabyn shyǵarýǵa demeýshilik jasaýdy kózdep otyr.
Eske sala ketelik, buǵan deıin Kompozıtor Ilıa Jaqanov Qazaqstannyń qurmetti jazýshysy atanǵanyn habarlaǵan edik.