Atyraý men Pavlodardaǵy munaı óńdeý zaýyttary jekeshelendirilýi múmkin

ASTANA. KAZINFORM – Básekelestikti qorǵaý jáne damytý agenttigi tóraǵasynyń birinshi orynbasary Rýstam Ahmetov taǵy eki munaı óńdeý zaýyty jekeshelendiriletinin málim etti.

- Atyraý men Pavlodardaǵy munaı óńdeý zaýyttaryn jekeshelendirý týraly bastama kóterilgenin rastaısyzdar ma? - dep surady jýrnalıst.

Rýstam Ahmetov bul málimetti rastap otyr.

- Iá, Básekelestikti qorǵaý jáne damytý agenttiginiń taldaýy aıasynda atalǵan aktıvterdi jekeshelendirý usynylǵan bolatyn. Jekeshelendirýdiń jobasy da usynylyp, aldyn ala maquldandy da. Bul jerde zaýyttardyń memleketke tıesili 50 paıyz aktıvin jekeshelendirý usynylyp otyr, - dedi ol.

Rýstam Ahmetov basqarýdyń mundaı úlgisi Shymkentte sátti iske asyp jatqanyn mysalǵa keltirdi.

- Qazir Shymkenttegi MÓZ-diń sátti jumys istep turǵanyn kórip otyrmyz. Onyń da 50 paıyz aktıvi jekeniń qolynda. Eń bastysy basqarý formasy jeke menshikte – memleket atynan basqaratyn laýazym joq, - dedi agenttik tóraǵasynyń birinshi orynbasary.

Eske salsaq, byltyr elimizdegi tórtinshi munaı óńdeý zaýytynyń qurylysy 2030 jylǵa shegerilgen bolatyn.