Atyraý men Astrahan arasynda avtobýs qatynasy jandanýy múmkin
ATYRAÝ. KAZINFORM – Atyraý men Reseıdiń Astrahan qalasy arasynda halyqaralyq avtobýs qatynasyn ashý jumystary júrgizilip jatyr. Qazirgi ýaqytta tıisti qujattar kelisý úshin Reseı Federatsııasynyń Kólik mınıstrligine joldanǵan.
«Atyraý – Astrahan» baǵytyn iske qosý úshin tıisti qujattardy «LaVaTrans» JShS Reseı Federatsııasynyń Kólik mınıstrligine joldaǵan. Oblystyq Jolaýshylar kóligi jáne avtomobıl joldary basqarmasynyń málimetinshe, atalǵan baǵyt boıynsha avtobýs qatynasy 2019 jyly toqtaǵan.
Qazirgi tańda Atyraý oblysynda 91 turaqty avtobýs baǵyty jumys isteıdi. Olardyń qatarynda qalalyq, aýdanishilik, oblysishilik jáne oblysaralyq marshrýttar bar. Búginde óńirdiń barlyq aýdan ortalyǵy turaqty jolaýshylar tasymalymen qamtylǵan.
– Oblysishilik negizgi baǵyttar boıynsha turaqty qatynas qamtamasyz etilgen. Olardyń qatarynda «Atyraý – Qulsary», «Atyraý – Inder», «Atyraý – Aqqystaý», «Atyraý – Beıbarys», «Atyraý – Dossor – Maqat», «Atyraý – Saǵyz», «Atyraý – Qurmanǵazy» jáne basqa da baǵyttar bar, - dep málimdedi basqarmanyń baspasóz qyzmeti.
Naýryzda «Qazavtojol» ulttyq kompanııasy bıyldan bastap júk kólikterine Atyraý-Astrahan baǵytyndaǵy jol aqyly bolatynyn habarlaǵan edi.
