Atyraý men Aqtaýdyń aralyǵyna jolaýshylar avtobýsy qatynaıdy

ATYRAÝ. KAZINFORM – Atyraý men Aqtaý qalalarynyń aralyǵyna jolaýshy tasymaldaıtyn qoǵamdyq kólikti iske qosý josparlanyp otyr. Alǵashqy avtobýs 14 naýryzda jolǵa shyǵady.

Avtomobıl kóligi jáne kóliktik baqylaý komıtetiniń 5 aqpanda bekitken kestege sáıkes jolaýshylar avtobýsy kún saıyn júredi. 

Eki qalanyń aralyǵy – 898 shaqyrym. Jolaýshylar avtobýsy Atyraý qalasynan tańǵy saǵat 7:00-de qozǵalyp, keshki saǵat 19:06-da Aqtaýǵa jetedi. Jol júrý uzaqtyǵy – 12 saǵat 6 mınýt. 
Jolaqysy bir baǵytqa eresekter úshin – 7 myń teńge. Al 7-18 jas aralyǵyndaǵy jasóspirimder 3 myń 500 teńge tóleıdi.

Qoǵamdyq kólik jolda úsh eldi mekenge toqtaıdy. Onyń biri – Atyraý oblysyndaǵy Qulsary qalasy. Mundaǵy toqtaý ýaqyty – 15 mınýt. 

Sondaı-aq Mańǵystaý oblysynyń Beıneý eldi mekeninde 25, al Shetpe aýylyndaǵy Qosbulaq shaǵyn aýdanynda 15 mınýt toqtap turady. 

Eske sala ketelik, budan buryn Atyraýdan Almatyǵa baratyn 160 jolaýshy Qarabatan stansasyna avtobýspen jetkizilgenin habarlaǵan edik.