Atyraý men Aqtaýda Qazbilim mektepteri nege jabyldy
AQTÓBE. KAZINFORM — Atyraýda mektep epıdemıologtardyń ruqsat qujaty bolmasa da jumys istep, lıtsenzııasynan aıyryldy. Al Aqtaýdaǵy mektep quryltaıshynyń ótishimen jumysyn toqtatty.
Qazbilim ulttyq lıtseıiniń quryltaıshysy Atyraýdaǵy mektepti tamyz aıynyń sońynda japty.
— Mektep ákimshiligi Atyraý oblystyq sanıtarııalyq-epıdemıologııalyq baqylaý departamentinen ruqsat almaı jumys istegen. Bıyl aqpan aıynda eskertý berilip, aıyppul salyndy. Al tamyzda prokýratýra Atyraý oblystyq bilim basqarmasyna mekteptiń ruqsat qujatsyz jumys istegenin habarlaǵan. Hat Atyraý oblystyq bilim berý salasyndaǵy sapany qamtamasyz etý departamentine tústi. Osy 19 tamyz kúni lıtsenzııasynan aıyrý týraly qaýly shyqty. Buǵan deıin de Atyraýda jeke mektepterde talaptar saqtalmaı, túrli jaǵdaı boldy. Bul — oqýshylardyń qaýipsizdigi úshin qabyldanǵan sheshim, — deıdi Atyraý oblystyq bilim berý salasyndaǵy sapany qamtamasyz etý departamentiniń basshysy Berdibek Taıshev.
Atyraýdaǵy Qazbilim ulttyq lıtseıinde 131 bala bilim alǵan. Oblys ákimi baspasóz qyzmetiniń habarlaýynsha, bári ózge mektepterge ornalasqan.
— 7 oqýshy Sana school Atyrau mektebine, 7 oqýshy Abyroı school mektebine aýysty. Al qalǵan oqýshylar Atyraý qalasyndaǵy mektepterge ornalasty, — dep habarlady Atyraý oblysy ákiminiń baspasóz qyzmeti.
Balasynyń oqý aqysyn aldyn ala tólegen ata-analar aqshasyn keri qaıtarýy tıis. Ázirge polıtsııaǵa olardan shaǵym túspegen.
Al Qazbilim ulttyq lıtseıiniń Aqtaýdaǵy bólimshesi suranys bolmaǵan soń jabylǵan.
— Mektepti ashý-jabý — quryltaıshynyń quqyǵy. E-ótinishke bir emes, úsh ret jumysyn toqtatý týraly ótinish tústi. Úshinshi ótinishi qabyldandy. Sebebi balalary, muǵalimderi tarap ketken, mektepte jumys isteıtin adam bolmady. Al Mańǵystaý oblystyq bilim berý salasyndaǵy sapany qamtamasyz etý departamenti tarapynan mektepke tekserý júrgizilmedi, — dedi Mańǵystaý oblystyq bilim berý salasyndaǵy sapany qamtamasyz etý departamentiniń basshysy Marat Súleımenov.
Aıta keteıik, mektep quryltaıshysy Aıatjan Ahmetjanuly áleýmettik jelidegi paraqshasynda Aqtaýdaǵy mektep ǵımaraty ózine tıesili ekenin, 4 aı buryn satýǵa shyǵarǵanyn habarlady. Atyraýda lıtsenzııasyn birjola, al Shymkentte 6 aıǵa toqtatqanyn jazdy.