Atyraý mektepteriniń ashanasynda 71 myńnan astam oqýshyǵa dıetalyq tamaq beriledi

ATYRAÝ. KAZINFORM – Atyraý oblysyndaǵy mektepterdiń ashanasynan 71 myńnan astam oqýshy tegin tamaq ishedi. Tegin tamaqtyń ortasha quny – 600 teńge.

Atyraý oblystyq Bilim basqarmasynyń bólim basshysy Dýlat Hamzınniń málimetinshe, bastaýysh synyptarda oqıtyn 60 myńǵa jýyq oqýshy tegin tamaq ishedi. Sondaı-aq 11 myńnan astam shákirt 5-11-synyptarda oqıdy. Olar – áleýmettik turmysy tómen otbasylardyń balalary.

– Atyraý oblysynda bir oqýshyǵa as máziri boıynsha qarastyrylǵan tamaqtandyrýdyń ortasha quny – 600 teńge. Tegin ystyq tamaqpen 33 jeke kásipker qamtamasyz etedi. Olardyń jumysy «Catering Atyrau» tamaqtandyrý qaýymdastyǵyna biriktirildi. Atalǵan qaýymdastyq ákimdikpen birlesken tıisti jumystardy atqaryp, qaýipsizdik talaptaryn tolyq saqtap keledi, - deıdi Dýlat Hamzın.

Onyń deregine qaraǵanda, mektepterde tamaq berý máselesin jáne taǵam sapasyn qadaǵalaý úshin 224 brakerajdyq komıssııa jumys isteıdi. Bıyl jeti aýdandyq, bir qalalyq, bir oblystyq vedomstvoaralyq saraptamalyq top qurylǵan.

Ashana menedjeri Raıhan Abdrahmanovanyń aıtýynsha, oqýshylarǵa tek dıetalyq taǵamdar usynylady. Mundaı taǵam balalardyń durys tamaqtanýy men qaýipsizdigi úshin qajet.

– Búgingi as mázirindegi ystyq taǵamda kókónis buqtyrmasy, sýsyn retinde S dárýmeni qosylǵan kısel, bıdaı unynan pisirilgen nan bar. Bul taǵamdar ár balaǵa jas ereksheligine saı ólshenip beriledi. Máselen, 1-4 synyp oqýshylaryn 200 gramm, 5-11 synyptaǵylardy 250 gramm ystyq taǵammen qamtamasyz etemiz, - deıdi Raıhan Abdrahmanova.

Balalary tegin ystyq tamaq ishetin ata-ananyń qatarynda Altynaı Naýryzbaeva da bar. Ol kúnde as mázirin kesteden kóredi.

– Tegin tamaqtaný jobasy mektep ata-analaryna unaıdy. Kúndelikti as mázirin arnaıy kesteden kóremiz. Bul balalarymyzdyń qandaı tamaq ishetinin bilýimizge jol ashty. Qatarlastarymen mektepten tamaq ishý ár balanyń tamaqtaný mádenıetiniń qalyptasýyna yqpal etedi, - dedi Altynaı Naýryzbaeva.

Eske sala ketelik, budan buryn Mańǵystaýdyń Beıneý aýdanynda 11 bala birdeı dıagnozben aýrýhanaǵa jetkizilgeni habarlanǵan edi.