Atyraý mektepterindegi beınebaqylaý júıesine JI engiziledi
ATYRAÝ. KAZINFORM — Bıyldan bastap Atyraý oblysyndaǵy bilim berý uıymdarynda ornatylǵan beınebaqylaý júıesine jasandy ıntellekt múmkindikteri engiziledi. Bul mektepter men balabaqshalardaǵy qaýipsizdikti kúsheıtip qana qoımaı, oqý úderisin baqylaýdyń tıimdiligin arttyrýǵa baǵyttalǵan.
Atyraý oblysy ákiminiń orynbasary Daryn Shamuratovtyń aıtýynsha, oblys aýmaǵyndaǵy 520 mektepke beınekamera ornatylǵan. Sonyń ishinde «Nazar» jobasy aıasynda qala mektepterine qoıylǵan 2500-ge jýyq kamera Polıtsııa departamentiniń jedel basqarý ortalyǵyna qosylǵan.
— «Nazar» jobasy 2024 jyly iske qosyldy. Bul — Qazaqstan boıynsha tek Atyraý oblysynda júzege asqan biregeı baǵdarlama. Joba qaýipsizdikti baqylaýmen qatar, sabaq ótý sapasyn da qadaǵalaýǵa múmkindik beredi. Ádiskerler úshin bul — úlken kómek. Aldaǵy ýaqytta kamera júıelerine jasandy ıntellekt fýnktsııalary engizilip, qaýipsizdik deńgeıi odan ári kúsheıtiledi, — dedi Daryn Shamuratov.
Sondaı-aq óńirdegi bilim berý uıymdarynyń basym bóligi tehnıkalyq qaýipsizdik quraldarymen tolyq jabdyqtalǵan. Atap aıtqanda, 495 nysanda týrnıket ornatylǵan, 462 mekeme lıtsenzııalanǵan kúzet qyzmetimen qamtylǵan, al 520 uıymda dabyl túımesi bar. Barlyq memlekettik balabaqshanyń kireberisine baılanys qurylǵylary qoıylǵan. Terrorıstik turǵydan osal dep tanylǵan 364 bilim berý nysany jedel basqarý ortalyǵyna tolyqtaı qosylǵan.
Ákim orynbasary jasóspirimder arasyndaǵy quqyqbuzýshylyqtyń aldyn alý jumystaryna da toqtaldy. Qazirgi ýaqytta 187 bala polıtsııa esebinde tur. Budan bólek, 275 oqýshy mektep pen kolledj ishilik esepke alynǵan, al 200-ge jýyq ata-ana qolaısyz otbasy retinde baqylaýǵa alynǵan. Osyǵan baılanysty óńirdegi barlyq oqý ornynda 8 myńnan astam profılaktıkalyq is-shara uıymdastyrylyp otyr.
Eske sala ketsek, osyǵan deıin Qyzylordada beınebaqylaý kameralary arqyly 176 qylmys ashylǵanyn habarlaǵan edik.
Sondaı-aq JI-kameralar patrýl kólikterine de ornatylǵanyn jazdyq.