Atyraý mektepterinde qyzmet babynda qaıtys bolǵan polıtseı atyndaǵy kadet synyby ashyldy
ATYRAÝ. KAZINFORM – Atyraý oblysynda 5 jyl buryn polıtsııa serjanty Shalqar Aqymǵalıev Jaıyq ózenine batqan qyzdy qutqarý kezinde qaza tapqan edi. Búgin qyzmet babynda tapqan polıtseı oqyǵan mektepte kadet synyby ashyldy.
Anasy Lázzat Muqanovanyń aıtýynsha, Shalqar bala kúninen polıtsııa qyzmetkeri bolýdy armandaǵan. Áskerden oralǵannan soń Atyraý qalalyq polıtsııa basqarmasynda 5 jyl jumys istegen.
«Dosyńa, qyzmetińe adal bol. Ýádeńe berik bol, amanatqa qııanat jasama» deýshi edim. «Anashym, alańdamańyz, aıtqanyńyzdyń bárin oryndaımyn, bári siz aıtqandaı bolady», dep erkeleıtin edi. Jumysyn adal atqardy», - deıdi anasy Lázzat Muqanova.
Shalqar Aqymǵalıev Bereke aýylyndaǵy orta mektepte oqyǵan. Ustazdarynyń aıtýynsha, mektepte alǵyrlyǵymen tanylyp, sabaqty jaqsy oqyǵan. Ásirese, jaratylystaný baǵytyndaǵy pánderge qyzyǵýshylyǵy basym bolǵan.
Búgin, Bereke orta mektebinde Shalqar Aqymǵalıev atyndaǵy kadet synyby ashyldy. Oǵan qyzmet babynda qaza tapqan polıtseıdiń anasy Lázzat Muqanova men inisi Meıirjan Kóshkinbaıuly, polıtsııa departamentiniń bastyǵy, general-maıor Nurhat Orazbaev pen áriptesteri qatysty.
Kadet synybynda Shalqar Aqymǵalıevtyń ómirbaıany, ár kezeńdegi sýretteri, qyzmettik kýáligi men marapattary týraly málimetter qoıylǵan. Munda polıtseıdiń kózi tirisinde tutynǵan buıymdary da bar.
Kadet synybyndaǵy alǵashqy dáristi polıtsııa kapıtany Rústembek Súndetov ótkizip, áriptesi Shalqar Aqymǵalıevtyń ómir joly men adamı qasıetteri, batyrǵa tán atyldyǵy, qyzmet atqarǵan jyldary týraly esteligimen bólisti. Sondaı-aq, polıtsııa qyzmetkeriniń qoǵamdyq tártipti saqtaýdaǵy mindetteri týraly áńgimeledi. Ol Shalqar Aqymǵalıevpen birge Jaıyq ózenine batqan áıeldi qutqarýǵa atsalysqan.
Atyraý oblystyq polıtsııa departamentiniń baspasóz qyzmetinen málim etkendeı, buryn Shalqar Aqymǵalıev atyndaǵy kadet synyby Inder aýdanynda ashylǵan. Al, búgin Jylyoı aýdanynyń ortalyǵy – Qulsary qalasyndaǵy №9 mektepte, Isataı aýdanyndaǵy bir bilim ordasynda ashylyp otyr.
Eske sala ketelik, buǵan deıin Atyraýdan kúzgi maýsymda 600-ge jýyq bozbala áskerge shaqyrylatynyn habarlaǵan edik.
