Atyraý mektepterinde ystyq tamaqqa bólinetin qarjy artty
ATYRAÝ. KAZINFORM — Atyraý oblysyndaǵy mektepterde oqýshylarǵa tegin beriletin bir rettik ystyq tamaqtyń quny kóterildi. Bilim berý basqarmasy bul ózgeristi as mázirin jaqsartý, taǵam túrlerin kóbeıtý jáne balalardyń kúndelikti tamaqtaný ratsıonynyń qunarlylyǵyn arttyrý qajettiligimen túsindirdi.
Bul másele 2025 jyldyń sońynda kóterilgen edi. Mektep oqýshylaryn ystyq tamaqpen qamtıtyn kásipkerlerdiń bir toby ár balaǵa ystyq tamaq berý úshin beriletin qarjy kólemin 1 myń teńgege deıin kóterýdi surady.
Tamyzda óńirdiń bas ustazy kásipkerlerdiń usynystary jan-jaqty qaralǵanyn, baǵa ózgerissiz qalatynyn aıtqan.
Degenmen oblys bıligi bul taqyrypty qaıta qaraǵanǵa uqsaıdy. Bilim berý basqarmasy oqýshylardyń jas erekshelikterine baılanysty bir rettik tamaqtaný qunynyń artqanyn málimdedi. Naqtyraq aıtqanda, 7–10 jas aralyǵyndaǵy balalar úshin bir rettik tamaqtaný quny 720 teńgeden 799,39 teńgege deıin, al 11–15 jastaǵy oqýshylar úshin 811 teńgeden 920 teńgege, 16–18 jastaǵy órenderge 863 teńgeden 983,85 teńgege deıin ósti.
— Jańa oqý jylyna arnalǵan as máziri bekitildi. Balalardyń jas ereksheligi men fızıologııalyq qajettilikteri eskerilip, bir balaǵa shaqqandaǵy tamaqtaný quny da ulǵaıtyldy. Negizgi maqsatymyz — oqýshylardy sapaly, qunarly ári qaýipsiz taǵammen qamtamasyz etý. Tamaqtaný qunynyń kóterilýi as mázirin jaqsartýǵa, taǵamdardyń túrin arttyrýǵa jáne balalardyń kúndelikti tamaqtaný ratsıonynyń qunarlylyǵyn qamtamasyz etýge múmkindik beredi, — dedi oblystyq bilim berý basqarmasynyń basshysy Marat Ábýov.
Tegin tamaqpen oblystaǵy barlyq mekteptegi bastaýysh synyptyń 57 302 oqýshysy jáne 5-11 synyptardaǵy áleýmettik osal toptarǵa jatatyn 8 302 oqýshy qamtylady.
Qazirgi tańda oblystaǵy 197 memlekettik bilim berý uıymynda bilim alýshylardy bir rettik tegin ystyq tamaqpen qamtamasyz etý qyzmeti konkýrstyq negizde uıymdastyrylǵan. Bul baǵytta 32 jeke kásipker qyzmet kórsetip otyr. Sonymen qatar 27 bilim berý uıymynda tegin ystyq tamaqtandyrý azyq-túlik ónimderin satyp alý arqyly uıymdastyrylǵan. Bul bilim berý uıymdaryna ashanalarda taǵam daıyndaý protsesin ózderi uıymdastyrýǵa múmkindik beredi.
Mektep ashanalarynyń materıaldyq-tehnıkalyq bazasyn tıimdi paıdalaný jáne tamaqtandyrý qyzmetin jetildirý maqsatynda memlekettik-jekeshelik áriptestik tetigi de iske asyrylýda. Qazirgi ýaqytta oblystaǵy 65 mektep ashanasy 20 kásipkerge jalǵa berilgen.
Buǵan deıin óńirge qarasty Jylyoı aýdanyndaǵy № 20 mekteptiń taǵdyryna qatysty ata-analardyń alańdaýshylyǵy jóninde jazǵan edik. Bılik bilim oshaǵy 2026–2027 oqý jylynda jabylmaıtynyn málimdegenimen, oqýshy sany azaısa, keıin mektepke qatysty sheshim qabyldanýy múmkin.
