Atyraý mektepterinde birinshi aýysym oqýshylary onlaın oqıtyn boldy

Atyraý qalasy mektepteriniń oqýshylary erteń túske deıingi sabaqty onlaın formatta oqıdy , dep habarlaıdy Kazinform.

Atyraý oblysy ákiminiń orynbasary Jasulan Bısembıevtiń aıtýynsha, aýa raıynyń kúrt salqyndaýyna baılanysty osyndaı sheshim qabyldanǵan.

«Erteń, 11 jeltoqsanda Atyraý qalasynda ornalasqan mektepterde birinshi aýysym sabaqtary qashyqtyqtan oqytylady. Balabaqshalar ata-analardyń qalaýy boıynsha bala qabyldaıdy. Ózge oqý oryndary shtattyq rejımde jumys isteı beredi», - dep habarlady Jasulan Bısembıev.

Eske sala ketelik, budan buryn Jaıyq ózeni qatyp, Atyraý sýsyz otyrǵany, ákimdikte komıssııa qurylǵanyn habarlaǵan bolatynbyz.

Keıin «Atyraý oblysy Sý Arnasy» ókili Jaıyqta muzdyń tyǵyz massasy 20 jyldan beri bolmaǵanyn aıtqan edi.

«Atyraý oblysy Sý Arnasy» KMK sý tazartý qondyrǵylarynyń basshysy Borıs Penkınniń aıtýynsha, ózende qabyrshaq muzdyń tyǵyz massasy paıda bolǵan. Mundaı qubylys shamamen 20 jyldan beri baıqalmaǵan.

«Bıyl Jaıyq ózeninde sý deńgeıiniń kúrt tómendegeni baıqalyp otyr. Máselen, keshe, 9 jeltoqsanda keshki birneshe saǵatta sý deńgeı 15-20 sm-ge tómendedi. Usaq muz krıstaldary sý jınaıtyn jabdyqqa ornatylǵan qorǵanys torlaryn bitep tastady», - dep málim etti Borıs Penkın.