Belgisiz bireýler Atyraý mańyndaǵy zıratty zaqymdaǵan

ATYRAÝ. KAZINFORM – Atyraý qalasyna qarasty Erkinqala aýyly mańyndaǵy musylman zıratynda vandalızm áreketi tirkeldi.

Áleýmettik jelide taraǵan málimetke sáıkes, belgisiz bireýler birneshe beıittegi jarty aı beınesin búldirip ketken. Keıbir qabirlerde belgi múlde julynyp tastalsa, basqalarynda jartylaı zaqymdanǵan. Osyǵan baılanysty Atyraý oblysy polıtsııa departamenti túsinikteme berdi.

— Erkinqala aýyly mańyndaǵy zırattardy búldirý deregine qatysty qylmystyq is qozǵaldy. Qazir qylmysqa qatysy bar tulǵalardy anyqtaýǵa baǵyttalǵan jedel-izdestirý sharalary júrgizilip jatyr. Tergeý nátıjesi qosymsha habarlanatyn bolady, — dep habarlady Atyraý oblysy polıtsııa departamenti.

Buǵan deıin Almaty oblysynda zırattyń qulyptastaryn qıratqan kúdikti ustalǵanyn jazǵanbyz.