Atyraý mańyndaǵy saıajaılarda ınfraqurylym máselesi sheshilmeı tur

ATYRAÝ. KAZINFORM — Atyraý qalasynyń mańynda 45 baý-baqsha qoǵamdastyǵy bar. Oǵan kiretin saıajaı turǵyndary ınjenerlik ınfraqurylymdardyń sheshimin tappaǵanyn jıi kóteredi.

ауыл, деревня, ветхие дома
Фото: Александр Павский / Kazinform

Saıajaı halqynyń janaıqaıy

Munaıly shaharǵa jaqyn ornalasqan «Rechnık», «Rybnık», «Hımık», «Gıdrotehnık» baý-baqsha qoǵamdastyǵyna kiretin saıajaılardyń turǵyndary baspanasyn jeke turǵyn úı sektoryna aýystyrýdy suraıdy. Alaıda birneshe jyldan beri bul másele sheshimin tappaı otyr.

Saıajaılar aýmaǵynda jol salynbaǵan. Elektr energııasynyń baǵasy qymbat. Turǵyndardyń janaıqaıy Premer-Mınıstrdiń birinshi orynbasary Roman Sklıarǵa deıin jetti. 

atyraý
Foto: vıdeodan alynǵan kadr

Máselen, «Rybnık» baý-baqsha qoǵamdastyǵynyń turǵyny Qaıyrjan Orazǵalıevtiń aıtýynsha, jergilikti atqarýshy organ ókilderi máseleni sheshpeı otyr. Joldyń joqtyǵy ábden sharshatqan. 

— Jergilikti ákimdiktiń máseleni sheship beremiz degenine biraz jyl ótti. Turǵyn úılerinińiz jeke sektorǵa aýystyrylady degen ýádesi de oryndalmaı keledi, -deıdi Qaıyrjan Orazǵalıev. 

Al Salıma Izgıevanyń aıtýyna qaraǵanda, kúıeýiniń birinshi sanattaǵy múgedektigi bar. Emhanaǵa barý úshin shaqyrtqan ınvataksı úıine deıin kelmeıdi. 

— Jolymyz kólik júrýge jaramaıdy. Sol sebepten ınvataksı de, jedel járdem kóligi de kóshemizge óte almaıdy. Kúıeýimdi emhanaǵa aparý úshin trassaǵa deıin arbasyn ıterip baramyn. Jańbyr jaǵan kezde batpaqpen júri tipten qıyn. Kúıeýimdi múgedekterge arnalǵan arbamen úı mańynda serýendete almaımyn, — deıdi Sálıma Izgıeva.

Turǵyndardyń pikirinshe, jaıaý júrginshiler joly joq. Sol sebepten balalar kólik jolymen júredi. Ata-analar balalarynyń qaýipsizdigine alańdaıdy.

Qaıyrjan Orazǵalıevtiń aıtýynsha, qalada jóndelgen joldan alynǵan asfalttyń qaldyǵyn kóshege tóseýge ruqsat berilmeı keledi. Saıajaı turǵyndary ony óz qarjysyna satyp alady. 

atyraý
Foto: vıdeodan alynǵan kadr

Mundaı derektiń baryn Atyraý oblystyq jolaýshylar kóligi jáne avtomobıl joldary basqarmasy basshysynyń orynbasary Erjan Haınollaev joqqa shyǵarmady. 

— Eski asfalttyń qaldyǵyn turǵyndardyń satyp alatynyn bilemiz. Ony jeke ıeliktegi júk kóligi bar adamdar tasymaldaıdy. Biraq ony udaıy baqylaý múmkin emes. Ótken jyly turǵyndardyń osyndaı derekke baılanysty shaǵymy tekserildi. Frezany satqan kólik júrgizýshisi jumystan shyǵaryldy. Al frezany barlyq saıajaıdaǵy kóshege tóseý múmkindigi joq. Turǵyndar mańyzdy kóshelerdiń tizimin jasap berse, soǵan asfalt qaldyǵyn tóseýge bolady, — deıdi Erjan Haınollaev. 

«Atyraý-Jaryq» AQ prezıdentiniń orynbasary Turlan Doshatovtyń málimetinshe, baý-baqsha qoǵamdastyǵyna elektr energııasy tehnıkalyq shartqa sáıkes berilip otyr. Alaıda ár turǵynmen jeke kelisimshart jasalmaǵan. 

— Munda turǵyn úıler jeke sektorǵa jatqyzylmaǵan. Sol sebepten, kelisimshart qoǵamdastyqtyń tóraǵasymen ǵana jasalady. Al tutynǵan elektr energııasynyń kórsetkishi ortaq transformatordan alynady, — deıdi Turlan Doshatov. 

Atyraý qalasy ákiminiń orynbasary Meıirjan Muqasovtyń málimetinshe, bıyl saıajaılardaǵy transformatorlardy «Atyraý-Jaryq» AQ-nyń balansyna berý kózdelgen. 

— Bıyl elektr energııasymen qamtý, tarıfti retteý máselesi sheshimin tabady, — deıdi ol.

Bas josparsyz másele sheshilmeıdi

Atyraý qalasy ákiminiń orynbasary Meıirjan Muqasovtyń Qazaqstan saıajaı jáne baý-baqsha sharýashylyqtaryn damytý jónindegi 2024-2026 jyldarǵa arnalǵan Jol kartasy aıasynda Atyraý oblysynda jumys tobynyń quramy bekitilgen. Jumys jospary jasalǵan.

— Qazir bizdegi aqparatqa sáıkes 45 baý-baqsha qoǵamdastyǵynyń alqabynda 15 myńnan astam turǵyn tirkelgen. Atyraý qalasy ákimdigi tarapynan túgendeý jumysy júrgizilip jatyr. Sonyń qorytyndysymen málimetter taǵy jańartylady, — deıdi Meıirjan Muqasov. 

a
Foto: Atyraý ákimdigi

Onyń aıtýynsha, Úkimettiń 2016 jylǵy 29 qarashadaǵy № 749 qaýlysymen bekitilgen Atyraý qalasynyń bas josparyna ózgerister engizý qajet.

Osyǵan oraı Atyraý oblystyq qurylys, sáýlet jáne qala qurylysy basqarmasymen birlesken jumystardy atqarý qolǵa alynǵan.

Shahardyń qaıta jasaqtalǵan bas josparyn Úkimet qaýlysymen osy jyldyń jeltoqsan aıynda bekitý josparlanǵan. 

— Osy tetikter iske asyrylǵannan keıin ǵana saıajaı alqaptaryna búkil qajetti ınjenerlik ınfraqurylymdy tartý múmkindigi qaralady. Atyraý qalalyq sáýlet, qurylys jáne jer qatynastary bólimi qolǵa alǵan túgendeý boıynsha jumysty jedeldetýge tapsyrma berildi. Infraqurylym salý úshin jobalyq-smetalyq qujattamany jedel bastaý, qala joldaryna qurylys-montaj jumystaryn jasaqtaý kezindegi bosaǵan frezany tapsyrysqa sáıkes bólý josparlanady, -deıdi Meıirjan Muqasov. 

Eske sala ketelik, buǵan deıin Atyraý oblysyndaǵy 153 aýyldyń 132-si ǵana ınternet jelisimen qamtylǵanyn habarlaǵan edik. 

Сейчас читают