Atyraý mańynda poıyz júk kóligimen soqtyǵysty: oqıǵa ornyna 12 qutqarýshy keldi

ATYRAÝ. KAZINFORM – Atyraý qalasynyń mańyndaǵy temirjol stansasynda júk poıyzynyń teplovozy men KamAZ kóligimen soqtyǵysty. 

Atyraý oblystyq Tótenshe jaǵdaılar departamentiniń ımıdjdik jumys jáne syrtqy kommýnıkatsııalar tobynan málim etkendeı, oqıǵa saldarynan úsh mashınıst jaraqat alǵan.

– Atyraý oblysynda Tendik stansasynyń kúzetilmegen temirjol ótkelinde júk poıyzy «KamAZ» júk kóliginiń tirkemesimen soqtyǵysty. Oqıǵa ornyna Tótenshe jaǵdaılar deparatmentiniń qyzmetkerleri jedel jetip, qutqarý jumysyn júrgizdi. Jedel-qutqarý jasaǵynyń qutqarýshylary teplovoz kabınasynan úsh mashınıst shyǵardy. Olardyń aıaq-qoldary synǵan. Zardap shekken mashınıster aýrýhanaǵa jetkizildi, - dep habarlady departamenttiń ımıdjdik jumys jáne syrtqy kommýnıkatsııalar toby.

Oqıǵa saldarynan 11 júk vagony relsten shyǵyp ketken. Al «KamAZ» kóliginiń júrgizýshisi zardap shekpegen.

Temirjol stansasyndaǵy oqıǵanyń saldarynan Qarabatan stansasynda «Mańǵyshlaq-Atyraý» jolaýshylar poıyzy keshiktirildi. Temirjoldaǵy apattyń saldaryn joıý úshin qalpyna keltirý poıyzy jiberildi.

Qazir oqıǵa ornynda qalpyna keltirý jumystary júrgizilip jatyr. Oǵan Atyraý oblystyq Tótenshe jaǵdaılar departamentinen 12 qutqarýshy men 4 arnaıy tehnıka tartylǵan.

Oqıǵanyń mán-jaıy anyqtalyp jatyr.

Atyraý oblysynda lokomotıv pen 11 vagon relsten shyǵyp ketip, jumysshylar zardap shekkenin jazǵan bolatynbyz.