Atyraý mańynda 37 sharýa qojalyǵynyń 3120 gektar jerin tasqyn sý basty
ATYRAÝ. KAZINFORM – Atyraý qalasynyń mańynda 37 sharýa qojalyǵynyń 3120 gektar jerin tasqyn sý basty.
Atyraý qalasy ákiminiń orynbasary Nurjan Ermuhanovtyń málimetinshe, shahar aýmaǵynda 265 sharýa qojalyǵy tirkelgen.
«Qazir 37 sharýa qojalyǵynyń 3120 gektar jerin sý basty. Onyń ishinde 18 sharýa qojalyǵy Sokolok kanalynyń mańynda mal ósiredi. Al, 19 sharýa qojalyǵy Almaly men Erkinqala aýyldyq okrýgterinde egin sharýashylyǵyn damytatyn edi. Jerin sý basqan sharýa qojalyqtaryndaǵy mal qaýipsiz aımaqqa kóshirildi. Sharýa qojalyqtarynda adam shyǵyny men turǵyn úılerdi sý basý deregi tirkelgen joq. Alaıda, «Altyn sazan» demalys orny men «Adaı» dúkeni zardap shekti. Ákimdik tarapynan qıyn jaǵdaıda qalǵan sharýa qojalyqtaryna tehnıka, janar-jaǵarmaı, qural-jabdyqtar, bóget salý, jáne malǵa qajetti jem-shóp túrinde kómek kórsetilip otyr» -dedi Nurjan Ermuhanov.
Onyń aıtýynsha, qala mańyndaǵy sý basý qaýpi basym Qaıyrshaqty, Erkinqala, Almaly aýyldyq okrýgterinde 180 sharýa qojalyqtary ornalasqan. Qazir Jaıyq ózeni jaǵalaýynyń qaýipti aýmaqtaryna táýlik boıyna kezekshilik uıymdastyrylǵan.
«Aýyl sharýashylyǵyna kelgen shyǵyndy óteý boıynsha qalalyq komıssııa qurý josparlanyp otyr. Komıssııanyń qorytyndysymen sharýa qojalyqtarynyń ıelerine ótemaqy tólenedi», -dedi Nurjan Ermuhanov.
Eske sala ketelik, budan buryn Qulsaryda sý tasqynynan 325 kásipkerlik sýbektisi zardap shekkenin habarlaǵan edik.
