Atyraý: Maqat aýdanynda úsh jyl buryn bastalǵan turǵyn úıdiń qurylysy bitpeı tur
ATYRAÝ. KAZINFORM – Atyraý oblysynyń Maqat aýdanynda úsh jyl buryn bastalǵan turǵyn úıdiń qurylysy bitpeı tur. Oǵan 865 mln teńge bólingen.
Sybaılas jemqorlyqqa qarsy is-qımyl agenttigi Atyraý oblystyq departamentiniń baspasóz qyzmetinen málim etkendeı, qurylysy uzaqqa sozylǵan nysandarǵa monıtorıng júrgizilip jatyr.
«Jemqorlyqqa qarsy volonterler men «Ádildik joly» RQB Atyraý oblystyq fılıalynyń ókilderi Maqat aýdanyndaǵy 3 qabatty 60 páterlik turǵyn úıdiń qurylysyna monıtorıng júrgizip, birqatar kemshilikti anyqtady. Máselen, nysannyń qajetti qorshaýy joq. Qazir jumysshy personal da joq. Temirbeton tósemderinde jaryqshaq paıda bolǵan», - dep habarlady departamenttiń baspasóz qyzmeti.
Osyǵan baılanysty volonterler nysandy merziminde paıdalanýǵa tapsyrý jóninde usynys berdi. Baqylaý júrgizbegen tapsyrys berýshini jaýapkershilikke tartýǵa bastamashylyq jasady.
«Maqat kentindegi 3 qabatty 60 páterlik turǵyn úıdiń qurylysy 2021 jyly bastalǵan. Alaıda, 2023 jyldyń basynda toqtap toqtap qalǵan. Sebebi – nyssan qurylysyn júrgizetin merdigerlikke tańdalǵan «Dan Stroı Baza LTD» JShS-da qarjylyq qıyndyq týyndaǵan. Atalǵan qurylys nysanynyń jalpy quny 865 mln teńgeni quraıdy. Osy kezge deıin qarjynyń 60%-y ıgerilgen. Tapsyrys berýshi sotqa talap aryzben júgindi. Sotta merdigerden 50 mln teńge kóleminde aıyppul óndirip alý týraly talap qanaǵattandyryldy», - dep málim etti departamenttiń baspasóz qyzmeti.
Qazir merdiger nysan qurylysyn óz qarajaty esebinen júrgizýdi bastaǵan. Turǵyn úıdi jyl sońyna deıin paıdalanýǵa berý josparlanyp otyr.
Eske sala ketelik, buǵan deıin Qulsaryda jóndeýine 2,1 mlrd teńge bólingen áleýmettik qyzmetter ortalyǵy bos turǵanyn habarlaǵan edik.
