Atyraý kóshelerin sý basty
ATYRAÝ. KAZINFORM – Atyraý qalasynda túnimen, búgin túske deıin jańbyr jaýdy. Tabıǵat qubylysynyń saldarynan kóshelerge sý jınaldy.
Búgin tańerteńnen beri «Arnaýly avtobaza» JShS-niń dırektory Almas Іzteleýovtiń aıtýynsha, kásiporyn qyzmetkerleri vakýým tehnıkasymen kóshelerdegi sýdy sorýǵa kiristi. Bul jumysqa 30-ǵa jýyq tehnıka tartylǵan. Kásipkerler 23 tehnıkasyn kómekke bergen.
«Tańerteńnen beri qala kóshelerinen, áleýmettik nysandardyń mańynan jańbyr sýy soryldy. Bul jumys Avangard, Saryqamys, Vokzal mańy shaǵyn aýdandary men B.Qulmanov, Azattyq kóshelerinde júrgizilip,, aryqtardy tazalaý jumysy júrip jatyr», - dedi Almas Іzteleýov.
Onyń málimetinshe, tańerteńnen beri 1800 tekshe metrge jýyq jańbyr sýy sorylǵan.
«Qala turǵyndary tabıǵat qubylysyna baılanysty sý sorýdy jónindegi ótinishin Atyraý oblysy ákimdiginiń 109 biryńǵaı baılanys ortalyǵyna bere alady. Ótinishke sáıkes naqtylanǵan mekenjaılarǵa arnaıy tehnıkany jiberemiz», -dep málim etti Almas Іzteleýov.
Eske sala ketelik, budan buryn Atyraýda qarashada qysqy maýsymda jolǵa sebetin 400 tonna tuz jetkiziletinin habarlanǵan bolatynbyz.
