«Atyraý» komandasy bas bapkeriniń mindetin atqarýshy: Qazirgi deńgeıimiz – osy, nátıje bolmaı tur

ATYRAÝ. KAZINFORM – «Atyraý» fýtbol klýby bas bapkeriniń mindetin atqarýshy Qýanysh Qabdolov qazirgi ahýal qıyn ekeni týraly pikir bildirdi.

Jeksenbide munaıly óńir fýtbolshylary óz alańynda «Qaısar» komandasyna ese jibergen edi. 

– Jaǵdaı qıyndaý. Bul oıynǵa barymyzsha daıyndaldyq. Shabýylda gol soǵatyn múmkindigimiz boldy. Biraq, qarapaıym sátte qatelik jasap, taǵy da óz qaqpamyzǵa penaltı ákeldik. «Qaısar» birinshi bolyp gol soǵyp, túgeldeı qorǵanysqa kóshti. Alaıda, odan da sańylaý taýyp, esepti teńestirgen edik. Keshirilmeıtin qatelik jasadyq. Nátıjesinde esep – 1:2, -dedi Qýanysh Qabdolov.

Bas bapker mindetin atqarýshynyń pikirinshe, komandaǵa jaqsy oıynshylardy alý kerek. 

– Men komandaǵa kele sala jańa fýtbolshylardy ákele almaımyn. Barymen – bazar. Endi transferlik «tereze» ýaqytynda quramdy kúsheıtpese bolmaıdy. Qazirgi quramda Premer-lıgada oınaǵan oıynshy az, legıonerlerdiń deńgeıin kórip otyrsyzdar. Jankúıerlerden keshirim suraımyz. Ár oıyn saıyn qoldan kelgenshe, tyrysyp jatyrmyz. Kimniń daıyndyǵy jaqsy, solardy oınatyp kelemiz. Biraq nátıje bolmaı tur. Qazirgi tańda, ókinishke qaraı, deńgeıimiz – osy, -dedi Qýanysh Qabdolov. 

Onyń aıtýyna qaraǵanda, komanda qarsylastan joǵary bolmaı tur. 

– Tóreshilik? Ol jaıly qansha aıtqanymyzben, upaı berilmeıdi. Olardyń óz departamenti bar, baǵasyn bere jatar. «Astanamen» oıynda bizge penaltı bermedi, kerisinshe bizdiń qaqpaǵa belgiledi. Oıynnan soń ol qate bolyp shyǵady. «Ordabasymen» oıynda Chadýnelıdi qulatyp, gol soǵyp ketedi. «Turanmen» oıynda bizge aýt bermeı, artynsha taǵy gol salyp ketedi. «Jetisýmen» oıynda penaltı belgilep, ony da qate dep esepteıdi. Búgingi oıyndaǵy penaltı boıynsha qaıtalaýdan qaraý kerek: boldy ma, bolmady ma?, -dep málim etti bas bapker mindetin atqarýshy. 

Ol problema bapkerlik shtabta bolsa, óz ornyn bosatýǵa daıyn ekenin jetkizdi. 

– Basshylyq solaı sheshse, sóz joq. Keıbir jankúıerler de solaı aıtyp jatyr. Biraq men bul komandany jınaǵan joqpyn. Qolda bar materıalmen bir aıdyń kóleminde jumys istep kelemiz. Deńgeı osy bolsa, biz ne isteı alamyz? –dedi Qýanysh Qabdolov. 

Eske sala ketelik, budan buryn «Atyraý» fýtbol klýby 4 legıonermen aradaǵy kelisimshartty toqtatqanyn jazǵan edik.