«Atyraý» klýby paravoleıboldan Azııa chempıonatynda jeńimpaz atandy
ASTANA. KAZINFORM – Qytaıdyń Hanchjoý qalasynda voleıboldy otyryp oınaýdan Azııa jáne Tynyq muhıt aımaǵy boıynsha klýbtar arasynda chempıonat máresine jetti.
Voleıboldy otyryp oınaýdan Qazaqstan ulttyq quramasynyń jáne «Atyraý» klýbynyń bas bapkeri Baýyrjan Tahaýovtyń Kazinform tilshisine málim etkenindeı, osyndaı deńgeıde alǵash ret uıymdastyrylǵan jarysqa elimizden atyraýlyqtarmen qatar «Qyzylorda», sondaı-aq Qytaı, Saýd Arabııasy jáne Aýstralııa komandalary qatysty.
«Atyraý» komandasy óz tobynda Saýd Arabııasy men Qytaıdyń eki klýbyn 3:0 esebimen jeńip, jartylaı fınalǵa birinshi orynmen shyqty. Jartylaı fınalda «Qyzylordadan» dál sondaı eseppen basym tústi – 3:0 (25-14, 25-11, 25-22).
30 qazan kúni fınalda qytaılyq Zhe Jiang klýbymen ótken oıyn óte tartysty boldy. Atyraýlyqtar 3:2 (25:13, 25:13, 24:26, 25:27, 15:10) esebimen jeńisti julyp alyp, chempıondyq tuǵyrǵa kóterildi.
Qyzylordalyqtar úzdik úshtikti túıindedi.
«Ulttyq quramanyń negizin Atyraý oblysynyń oıynshylary quraıdy. Bıyl Atyraýdan 8 sportshy Qazaqstan sapynda Parıj Paralımpıadasyna qatysyp, 5-orynǵa ıe boldy. Álemde 78 komanda bolsa, solardyń arasynan aldyńǵy lekke iligý – úlken jetistik. Endi tórt jyldan keıin Los-Andjeleste ótetin Paralımpıada oıyndaryna daıyndalamyz. Álemdik reıtıngide qazirgi kezde Qazaqstan quramasy 5-orynda tur», - dedi B.Tahaýov.
Eske sala keteıik, budan buryn Paralımpıadada Qazaqstan voleıbolshylarynyń jartylaı fınaldan tys qalǵanyn jazǵan bolatynbyz.
