Atyraý kásipkerleri qandaı kedergilerge ushyrap júr
ATYRAÝ. KAZINFORM – Atyraý oblysynyń kásipkerleri jergilikti atqarýshy organdar men kommýnaldyq qyzmet kórsetetin kompanııalardyń tarapynan kedergige tap bolyp otyr. Shaǵyn jáne orta bıznes ıelerine ákimshilik kedergi jasalǵan.
Sybaılas jemqorlyqqa qarsy is-qımyl agenttigi Atyraý oblystyq departamentiniń basshysy Erulan Serikqalıevpen kezdesken kásipkerler jıi ushyraıtyn túrli problemany ashyq aıtqan.
– Jergilikti atqarýshy organdar tarapynan kásipkerler ıeligindegi jer ýchaskeleriniń nysanaly maqsatyn keńeıtýden jáne ózgertýden zańsyz bas tartylǵan. Bekitilgen bas jospar naqty jer ýchaskesimen sáıkes kelmeıdi. Al taýarlar men qyzmetterdi satyp alý kezinde tabıǵı monopolııalar sýbektileri tarapynan ákimshilik kedergiler jasaıdy. Máselen, kásipkerdiń biri tabıǵı monopolııalar sýbektileri – «Atyraý-Jaryq» AQ, «ATETs» AQ jáne «Atyraý jylý jelileri» AQ-nyń qyzmetine shaǵymdandy. Kompanııalar satyp alý týraly sharttarda taýarlar men qyzmetterdi jetkizgeni úshin aqy tóleý merzimin 360 banktik kún ishinde dep kórsetedi. Satyp alýǵa qatysatyn áleýetti ónim berýshilerdiń qujattaryn qaraý fýnktsııalary «Eurasiantech-Tender» portalynda múmkin emesin jetkizdi, -dep habarlady Erulan Serikqalıev.
Onyń aıtýyna qaraǵanda, kommýnaldyq qyzmet kórsetetin kompanııalarǵa birneshe usynys berilgen. Birinshisi – naqty tólem merzimin 30 kúnge deıin kórsetý, ekinshisi –tenderlerdiń barlyq qatysýshysy men tabıǵı monopolııalar sýbektileri arasynda usynylatyn qujattardy qaraý fýnktsııasyn «Eurasiantech-Tender» portalyna engizý. Úshinshisi – atalǵan portaldy qaraý bóligindegi erejege ózgerister men tolyqtyrýlar engizý.
– Qazir oblysta kásipkerler qyzmetindegi problemalyq máselelerdi joıýǵa kómektesetin «Bızneske jol» jobasy júzege asyrylyp jatyr. Osyǵan oraı kezdesýde kásipkerlerden túsken 4 ótinish, olar aıtqan shaǵymdar qysqa merzimde qaralady, - deıdi Erulan Serikqalıev.
Eske sala ketelik, buǵan deıin Atyraýda kásipkerler qandaı kedergige jıi kezigetinin habarlaǵan edik.